Son vaxtlar Azərbaycanda maaş və pensiyalarda artımlar olub. Bununla paralel olaraq ərzağın, dərman preparatlarının bahalaşması da müşahidə edilir. Vətəndaşlar bahalaşma səbəbindən maaş və pensiya artımının kifayət etmədiyini bildirirlər.

Azərbaycanda bir ailənin normal yaşaması üçün nə qədər pensiya və maaş bəs edər? Minimum əməkhaqqı, pensiya nə qədər olsa, insanlar rahat dolana bilər?

Globalinfo.az-a danışan sosioloq Lalə Mehralının sözlərinə görə, hazırkı bahalığın fonunda əməkhaqları cılız qalıb, pensiyalar minimum xərcləri ödəyir.

O deyib ki, əhalinin gəlirləri ilə xərcləri bir-birinə adekvat deyil:

“Əməkhaqqı bir aylıq xərclərinə yetmir. Bir şəxs pensiya ilə istirahətə gedə bilmirsə, necə razı qalmaq olar? Qarnı tox olmayan, istirahət edə bilməyən, övladının ehtiyaclarını ödəyə bilməyən kim “xoşbəxtəm” deyər? Minimum əməkhaqqına nə almaq olur indi? Bir aylıq güzəranı təmin edə bilirmi? Təbii ki, yox. İkinci işə, daha çox qazana biləcəyimiz işə ehtiyacımız olur”.

L.Mehralının fikrincə, təqaüddə olan insanlar üçün vəziyyət daha çətindir:

“Əgər təqaüddə olan birinin başqa yerdən gəliri yoxdursa, vəziyyəti çətin olacaq. Heç təqaüd yaşına çatmayan, 50-55 yaşında insanlara iş verən yoxdur. Onlar ciddi formada işsizlik problemi yaşayır. Əgər ailə başçısıdırsa, himayəsində uşaqlar varsa, onları nə ilə təmin etməlidir? Yaxud minimum əməkhaqqı alsalar nəyə yetəcək? Uşaqpulu yox, sosial imtiyazlar, güzəştlər yox. Əməkhaqqı, pensiya artmalıdır ki, ehtiyaclar ödənilsin”.

Sosioloqun sözlərinə görə, bir ailənin normal yaşaması üçün minimum 1500-2000 manat vəsait tələb olunur:

“Baxın, 4-5 nəfərlik bir ailənin normal sosial təminatı üçün minimum 1500-2000 manat gəlir olmalıdır. Əgər uşaqlar repetitor yanına getmirlərsə, ailədə sağlamlıq problemi olan yoxdursa, səhiyyə xərcləri olmayacaqsa, kirayədə qalmırlarsa və s. bu məbləğ onların dolanışığı üçün normal hesab oluna bilər”.