Rəsmi Vaşinqtonun Tayvan adasının administrasiyasına 385 milyon dollar dəyərində silah satmaq qərarı Çini sarsıdır. Bunun ilə əlaqədar Çin danışıqlar üçün ABŞ-a nümayəndələr göndərib.

Teleqraf.com xəbər verir ki, bu barədə Çinin Xarici İşlər Nazirliyinin rəsmi saytında məlumat verilib.

Xəbərdə bildirilir ki, ABŞ-ın Çinin Tayvan bölgəsinə silah satması vahid Çin prinsipini və "Çin-Amerika birgə kommunikesi"ni ciddi şəkildə pozur.

"Bu addım Çinin suverenliyini və təhlükəsizliyini təhdid edir və onu sarsıdır. ABŞ-ın bu münasibəti Tayvan boğazında sülh və sabitliyi sual altında qoyur", - deyə Çin Xarici İşlər Nazirliyinin saytında dərc olunmuş bəyanatda qeyd edilir.

Xatırladaq ki, Tayvan 1949-cu ildən, Çan Kay-şekin başçılıq etdiyi qüvvələri Çin Vətəndaş Müharibəsində məğlub olduqdan sonra adaya qaçaraq özlərinin administrasiyasını qurublar. O vaxtdan bəri Taypey kommunistlər hakimiyyətə gələnə qədər materikdə mövcud olan keçmiş Çin Respublikasının bayrağını və bəzi digər atributlarını qoruyub saxlayır. Hazırda 23 ölkə Tayvanın müstəqilliyini tanıyır.