Benqal körfəzində yaranan tropik fırtına səbəbindən Hindistanda məktəblərdə təhsilə ara verilib, qatar reysləri ləğv edilib, 300 min nəfər təhlükəsiz bölgələrə təxliyə olunub.

Axar.az Trend-ə istinadən xəbər verir ki, Dana tropik fırtınasının sürətinin saatda 100-120 kilometrə çatdığı, bu gün axşam saatlarında və ya sabah səhər erkən saatlarda ölkənin şərq sahilinə çatmasının gözlənildiyi bildirilib.

Məlumata görə, 14 rayondan 1 milyondan çox insanın təxliyə edilməsi planlaşdırılır. Şiddətli qasırğa və fırtınaların müşahidə edildiyi ştatlara çox sayda yardım və xilasetmə qrupları yerləşdirilib.

Qeyd edək ki, keçən il Hindistanda baş verən fırtınalar nəticəsində 523 nəfər həyatını itirmiş və ölkəyə 2,5 milyard dollarlıq ziyan dəymişdi.