Hazırda dünyanın diqqəti noyabrda ABŞ-da keçiriləcək prezident seçkiləri ilə bağlı prosesdədir. Səsvermədə iki əsas namizəddən hansının – keçmiş prezident Donald Trampın, yoxsa hazırkı vitse-prezident Kamala Harrisin qalib gələcəyi isə maraqla gözlənilir.

Bəzi ekspertlərin fikrincə, İsrail İrana gözlənilən zərbəni vurarsa, bu, Trampın qalib gəlməsinə təkan vermiş olacaq. Keçmiş prezident Təl-Əvivi Tehranın nüvə obyektlərini vurmağa çağırıb.

Həmçinin davam edən Rusiya-Ukrayna müharibəsinin də Trampa böyük üstünlük verdiyi idda olunur. Hətta onun bu müharibəni dayandıra biləcəyini düşünənlərin sayı az deyil.

Dünyadakı hazırkı gərginliklər ABŞ prezident seçkilərinə necə təsir edə bilər?

Globalinfo.az-a danışan politoloq Oqtay Qasımov deyib ki, ABŞ-dakı siyasi vəziyyətlə dünyanın ümumi siyasi şəraitindəki hadisələr bir-birinə daim təsir edir:

“Hazırda ABŞ-da davam edən seçki kampaniyasına təsir göstərən iki amil var: daxili və beynəlxalq faktorlar. Tramp hazırkı hakimiyyəti və Kamala Harrisi bir çox məsələdə ittiham edir. Məsələn o, hökuməti miqrant siyasətini düzgün aparmamaqda, həmçinin iqtisadiyyatın geriləməsində günahlandırır. Tramp qeyd edir ki, onun hakimiyyəti müddətində iqtisadiyyat indikindən çox daha yaxşı vəziyyətdə idi.

Əsas iradı isə Rusiya-Ukrayna müharibəsi və İsraillə bağlıdır. O deyir ki, hazırkə prezident Co Bayden Ukraynada müharibəsinin başlanmasının qarşını ala bilmədi. Hazırda isə İsrailin təhlükəsizliyinə də problem yaranıb.

Politoloqun sözlərinə görə, Trampın iradları başa düşüləndir.

“Hazırkı beynəlxalq şərtlərdə seçki marafonuna qatılan namizədlərin imkanları həm də Rusiya-Ukrayna müharibəsinin gedişatından, İsrailin regiondakı əməliyyatlarından asılı olacaq.

Mövcud administrasiya ilə İsrail arasında fikir ayrılıqları var. Bu Kamala Harissin şansını azaldır. İsrailin seçkilərə təsiri məcazi mənada olsa da, bu gün ABŞ-da nüfuzlu yəhudilərin olduğu aydın məsələdir. Seçki kampaniyasında onların dəstəyi çox vacibdir”.

Qeyd edək ki, ABŞ-da prezident seçkiləri noyabrın 5-də keçiriləcək.