Rusiya-Ukrayna müharibəsi Qafqaza – Azərbaycan sərhədlərinə doğru yaxınlaşır.

Publika.az xəbər verir ki, dünən gecə saatlarda Adıgey Respublikasının Maykop şəhərinin ətraf bölgələri Ukrayna dronlarının hücumuna məruz qalıb.

Adıgey Respublikasının rəhbəri Murat Kumpilov bildirib ki, Maykop şəhəri PUA-larla hücuma məruz qalıb.

“Ölən və yaralanan yoxdur. Xüsusi xidmət orqanları və xilasedicilər hadisə yerindədir. Fövqəladə Hallar Nazirliyi yanğının söndürülməsini həyata keçirib”, - o bildirib.

Kumpilov qeyd edib ki, Rodnikovovo kəndinin sakinlərinin mütəşəkkil təxliyəsi aparılır: “Təxliyə edilənlər Xanskaya kəndində müvəqqəti yaşayış məntəqəsi ilə təmin olunacaqlar”.

Rodnikovovo kəndi hərbi aerodromun yanında yerləşdiyi üçün hücum riski ilə üz-üzədir. Kəndin təxliyə edilməsi növbəti hücumların da ola biləcəyindən xəbər verir. Əhalinin köçürüldüyü Xanskaya kəndi də əsas hədəflərdən biridir. Çünki “Xanskaya” hərbi aerodromu kəndin 3 kilometrliyində yerləşir. “Astra” telegram kanalı dünə gecə “Xanskaya” aerodromunun yaxınlığında güclü partlayışın olduğunu yazıb.

Şimali Qafqaz bölgəsinə daxil olan Adıgey Qara dənizə yaxın ərazidə yerləşir. Ukrayna ordusunun bura çatması o qədər də təəccüblü deyil. Hərçənd, Adıgeye hücum müharibənin Şimali Qafqaz bölgəsinə sıçramasına səbəb ola bilər ki, bu da Azərbaycan da daxil olmaqla Cənubi Qafqaz bölgəsinə risklər yaradır.