Son vaxtlar Yaxın Şərqdə gərginlik pik həddə çatıb. Qonşu ölkə İranın İsraillə münasibətlərinin gərginləşməsi fonunda yeni, geniş müharibənin başlayıb-başlamayacağı maraq doğurur. Digər tərəfdən böyükmiqyaslı qarşıdurma ehtimalı soydaşlarımızın taleyi ilə bağlı narahatlıqları artırıb. Hazırda daha çox müzakirə edilən məsələlərdən biri də Azərbaycanın qaçqın axını ilə üz-üzə qalacağı ilə bağlıdır.

Bu realdırmı? Hərbi əməliyyatlar intensiv hal alarsa, ölkəmiz insan köçü ilə üzləşə bilərmi?

Globalinfo.az-a danışan deputat Hikmət Babaoğlu deyib ki, Yaxın Şərqdə baş verən proseslərin daha radikal formada davam etməsi arzuolunan deyil:

“Bu proses baş verərsə, region yeni reallıqlarla üzləşə bilər. Region ölkələrində, İranda ölkə daxili və xarici miqrasiya halları ilə qarşılaşa bilər. Əslində bu məsələnin bir qədər şişirdildiyini düşünürəm. İranın hər hansı müharibəyə birbaşa qoşulması halında ölkəyə xeyli sayda qaçqın axını olacağını ilə bağlı fikirlər səsləndirilir. Birincisi, ölkəmizə sığınan soydaşlarımızı Azərbaycan imkanları daxilində qəbul edəcək. Çünki Prezident İlham Əliyev dəfələrlə açıqlamasında bildirib ki, dünyada yaşayan bütün azərbaycanlıların hüquqları və salamatlığı bizim probelmimizdir. Rəsmi Bakının siyasi iradəsinin göstəricisidir”.

Deputat qeyd edib ki, İran faktiki olaraq uzun müddətdir, müharibə aparır:

“Suriya, Livan və İraqda yaşanan gərginliklər, proksi müharibələr buna misaldır. İran təcrübəsinə baxdıqda görürük ki, 8 il davam edən İran-İraq müharibəsində sığınacaq tələbi ilə insanlar daha çox Avropaya üz tutdular. Qaçqın axını arzuolunmaz ssenaridir. Lakin Azərbaycan bütün soydaşlarımızın humanitar problemlərinin həlli ilə məşğul olacaq. Qeyri-azərbaycanlılar da Azərbaycanın hümanitar himayəsinə güvənə bilərlər”.