Ermənistan Baş naziri Nikol Paşinyanı devirmək planı alınmayan revanşist keşiş Vazgen (Baqrat) Qalstanyan addım-addım siyasi iddialarından geri çəkilir.

Teleqraf.com xəbər verir ki, keşiş rəhbərlik etdiyi revanşist hərəkatın gündəmində erkən parlament seçkilərinin olmadığını bildirib.

“İndi belə bir şeyi nəzərdən keçirmirik, ümumiyyətlə, bu haqda düşünmürük. İndiki mərhələdə bu haqda danışmağa belə ehtiyac yoxdur”, - Qalstanyan deyib.

Keşiş mayın 9-da İrəvanda mitinqə başlayanda Paşinyana istefa verməsi üçün bir saat vaxt vermişdi.

Tələbi indiyədək yerinə yetirilməyən Baqrat bundan sonra baş nazirin impiçmenti məsələsini gündəmə gətirib, ancaq müxalifət parlamentdə azlıqda olduğu üçün bu, baş tutmayıb. Hərəkatı fiaskoya uğrayan keşişin Paşinyanla görüşə çağırışları da özünə müsbət cavab tapmır. Bu fonda mayın 26-da “həlledici mitinq”ə başlayacağını bəyan etmişdi, ancaq bu da alınmadı.

Həmin gün azsaylı etirazçı önündə özünü baş nazirliyə namizəd elan edən Baqrat indi hələlik dəstəsi ilə İrəvanda bir köşəyə çəkilib. Görünən budur ki, impiçment və istefaya məcburetmə planları baş tutmayan revanşistlər erkən seçki məsələsini də gündəmlərindən çıxarıblar.

Müəllif: Mənsur Rəğbətoğlu