İran Prezidenti İbrahim Rəisinin helikopter qəzasında həlak olması səbəbindən keçiriləcək növbədənkənar prezident seçkilərinə namizədliklərinin irəli sürülməsi ehtimal olunan şəxslərin adları açıqlanıb.

Yenipress.az xəbər verir ki, bu barədə “Şəfəqna” saytı məlumat yayıb.

Onların arasında Təbrizin İran parlamentindəki millət vəkili Məsud Pezeşkian, Həmədandan olan İran Mərkəzi Bankının keçmiş rəhbəri Əbdülnasir Hümməti və bir çox əhəmiyyətli vəzifələrdə işləmiş marağalı Möhsün Mehrəlizadənin də adı var.

Onlarla yanaşı, İshaq Cahangiri, Məhəmməd Cavad Zərif, Mahmud Əhmədinejad, Məhəmməd Bagir Qalibaf, Məhəmməd Müxbir, Məhəmmədrza Arif, Məhəmməd Bagir Nobəxt, Səid Cəlili, Hüseyn Dehqan, Həddad Adil, Pərviz Fəttah, Əlirza Zakani, Möhsün Haşiməli Laricaninin də növbəti prezident seçkilərində iştirakı gözlənilir.

Siyasi şərhçilər bildirirlər ki, adıçəkilən azərbaycanlıların, xüsusən Məsud Pezeşkianın prezident olmaq şansı yüksəkdir. Lakin azərbaycanlıların islahatçı mövqelərinə görə Əli Xamenei və ətrafının buna imkan verəcəyi gözlənilmir.

Bundan əvvəlki prezident seçkilərində həmədanlı Əbdülnasir Hümməti İbrahim Rəisinin ən ciddi rəqibi hesab edilirdi.

Qeyd edək ki, seçkilərdə iştirak edəcək namizədlər mayın 28-dən qeydiyyata alınacaq və növbədənkənar prezident seçkiləri iyunun 28-də keçiriləcək.