Azərbaycanda insanların neçə yaşında evləndiyinə dair statistik məlumatlar diqqət çəkir.

"Cebhe.info" xəbər verir ki, vətəndaşların evlilik yaşı hər il artır.

Belə ki, 1992-ci ildə kişilərin nikaha daxil olduğu orta yaş 26,7, qadınların isə 23,2 idi. 1996-ci ildə isə sözügedən rəqəm kişilərdə 28,0, qadınlarda 23,3 olub.

Kişilərin orta evlilik yaşı 1999-cu ildə 28,4, qadınlarda isə 23,5-ə qalxıb. Bu rəqəmlər 2002-ci ildə də artmağa davam edib. Həmin ildə kişilərin göstəricisi 28,6, qadınların isə 23,8 olub.

Sonrakı illərdə orta evlilik yaşında ay fərqi ilə cüzi azalmalar olub. Hətta 2010-cu ildə kişilərin orta nikah yaşı 27,9-a, qadınların isə 23,4-ə düşüb. Buna baxmayaraq, rəqəmlər elə 2011-ci ildə yenidən artıb. Kişilər 28,3, qadınlar 23,7. Növbəti 6 ildə də bu statistikalar artan templə davam edib. 2017-ci ildə kişilərdə bu statistika 28,8-ə, qadınlarda isə 24,2-yə yüksəlib.

Kəskin artış 2019-cu ildə də davam edib. Kişilərin orta evlilik yaşı 29,4, qadınların isə 24,7 təşkil edib. Sözügedən statistikanın ən pik həddi isə 2020-ci ilə qeydə alınıb. Həmin il kişilərin nikaha daxil olduğu orta yaş 30,0, qadınlarda isə 25,2 olub.

2022-ci ildə nikaha daxil olma yaşında nisbətən azalma yaşanıb. Müvafiq dövrdə kişilərin orta evlilik yaşı 29,8, qadınların isə 24,9-a geriləyib.

Bildirək ki, sözügedən rəqəmlər Dövlət Statistika Komitəsinin rəsmi məlumatlarına əsaslanır.