Ukrayna prezidenti Vladimir Zelenski ölkəsinə yardımın gecikməsindən Rusiyanın faydalandığını bildirib və “cəbhələrdə vəziyyətin çətin olduğunu” deyib.
Elchi.az xəbər verir ki, Ukrayna prezidenti Vladimir Zelenski ölkəsinin şimal-şərqindəki cəbhə xəttinə səfər etdikdən sonra açıqlama verib.
Zelenski açıqlamasında ölkəsinə yardımın gecikməsindən Moskvanın faydalandığını bildirib və “Hazırda cəbhə xəttinin müxtəlif yerlərində rus qoşunlarının cəmləşdiyi çox çətin vəziyyət var” deyib.
Yardımın gecikməsindən Rusiyanın faydalanmasının çox həssas bir mövzu olduğunu deyən Zelenski, artilleriya çatışmazlığının olduğunu ifadə edərək, “Cəbhə xəttində hava hücumundan müdafiə və daha uzun mənzilli silahlara ehtiyacımız var” -deyib.
Uzun müzakirələrdən sonra ABŞ Senatı bu yaxınlarda Ukrayna, İsrail və Tayvana yardım da daxil olmaqla 95,3 milyard dollarlıq dəstək paketini təsdiqləyib.
Yardım paketinə Ukraynaya “Rusiyaya qarşı mübarizəsini dəstəkləmək üçün” 60 milyard dollar, İsrailə “təhlükəsizliyə yardım göstərmək üçün” 14 milyard dollar və Tayvana və Hind-Sakit okean regionunda ABŞ-ın digər müttəfiqlərinə dəstək üçün 8 milyard dollar daxildir.
Senatda təsdiqlənən paketin təsdiq üçün Nümayəndələr Palatasına təqdim ediləcəyi gözlənilir. ABŞ prezidenti Co Baydenin paketi imzalaması və qanuna çevrilməsi üçün paket Nümayəndələr Palatası tərəfindən təsdiqlənməlidir.
2023-cü ildə ABŞ Ukraynaya 34 ayrı paketdə ümumilikdə 24 milyard dollarlıq müdafiə yardımı göstərib.