Gürcüstanın baş nazirinin müavini Tea Tsulukiani hökumətin iclasından sonra keçirdiyi brifinqdə bildirib ki, prezident Salome Zurabişvili İlham Əliyevi Azərbaycanda keçirilən prezident seçkilərində qələbəsi münasibətilə təbrik etməkdən çəkinməklə ölkəyə ziyan vurur.

Publika.az xəbər verir ki, bu barədə Gürcüstan mətbuatı məlumat yayıb.

“Cənab Əliyevi qələbə münasibətilə təbrik etməkdən çəkinən Gürcüstan prezidentinin susması, məncə, dövlətimizə ziyan vurur. Biz hamımız prezidentimizə xatırlatmaq istəyirik ki, bu, son illərdə geosiyasi və təhlükəsizlik risklərinin artdığı regiondur”, - deyə Tsulukiani əlavə edib.

Gürcüstanın müdafiə naziri İrakli Çikovani əlavə edib ki, sadə diplomatik etiket belə bir təbrikin səsləndirilməsini tələb edir. “Prezidentin bu istiqamətdə göstərdiyi fəaliyyətsizlik mənim üçün anlaşılmazdır, çünki hamı başa düşür ki, bizim Azərbaycan Respublikası ilə strateji tərəfdaşlığımız və əməkdaşlığımız var”, - deyə siyasətçi bildirib.

Bundan əvvəl “Xalqın Gücü” ictimai hərəkatının deputatı Sozar Subari “ İmedi” telekanalına müsahibəsində Gürcüstanın hazırkı prezidenti Salome Zurabişvilini ölkəyə qarşı düşmənçilikdə ittiham etmişdi.

Tural