Mayın 14-də böyük məğlubiyyətə uğrayan "7-li koalisiya"da parçalanma əlamətləri görünməyə başlayıb.

Publika.az Türkiyənin "Sabah" qəzetinə istinadən xəbər verir ki, DEVA Partiyasının sədri Əli Babacanın qatıldığı efirdə səsləndirdiyi fikirlər CHP tərəfdarlarını hiddətləndirib.

“Söhbət 81 vilayət və 766 rayonda təşkilatı olan və hakimiyyət üçün görünməmiş hazırlıqlar aparan partiyadan gedir. İlk dəfədir ki, seçkilərdə iştirak edirik. Öncədən düşünmə, planlaşdırma var. Əvvəlki planlama bizim və CHP-nin bir yerdə olması idi. Gəlin nəticələrə baxaq. CHP-nin səsi 6,8 faiz artıb. Namizədlərimizin olduğu bütün yerlərdə CHP-nin səslərində ciddi artım var. Biz bunların hamısına layiq idik və qazanılan bütün səslər halalımızdır. Biz olmasaydıq, bu qədər səs toplanmazdı”, - o söyləyib.

CHP-dən on millət vəkili yeri qoparan Əhməd Davudoğlu isə ortağını məğlubiyyəti ilə baş-başa buraxaraq, deputat seçilən həmin kəslərlə fotosunu paylaşıb. Lakin bir müddət sonra şəkli silmək məcburiyyətində qalıb.

Qeyd edək ki, Millət İttifaqının ortaqlarından olan Gələcək Partiyası 28-ci çağırış Parlament Seçkilərinə CHP siyahısından 19 namizədlə qatılıb və 10 namizədi parlamentdə kürsü qazanıb.

Kılıçdaroğlunun məğlubiyyətinə ortaqlarından daha bir diqqətçəkən təpki gəlib. Belə ki, DEVA Partiyasının sədr müavini İdris Şahin canlı yayım zamanı Kamal Kılıçdaroğlunun prezident seçkilərinin ilk turunda heç bir anketdə qalib gəlmədiyini deyib. O bildirib ki, Kamal Kılıçdaroğlunun birinci turda qalib gələcəyi ilə bağlı iddialar tamamilə yanlış idi.

Mehti Kamiloğlu