Çin süni intellektlə idarə olunan və müstəqil şəkildə hava, yerüstü və sualtı pilotsuz uçuş aparatlarını işə sala bilən dünyada ilk pilotsuz gəmi yaradıb.

Bildirilir ki, tədqiqat üçün nəzərdə tutulan “Zhu Hai Yun” Quandun əyalətindəki Cənubi Çin Dəniz Elmi və Mühəndislik Laboratoriyası tərəfindən idarə olunur.

Gəmi insan müdaxiləsi olmadan açıq okeanda müstəqil şəkildə hərəkət edə və tapşırıqları yerinə yetirə bilir. Lakin lazım gələrsə, operator nəzarəti öz üzərinə götürə bilər.

Gəminin və pilotsuz təyyarələrin sınaqları ötən həftə baş tutub, “Zhu Hai Yun” 12 saat ərzində müstəqil şəkildə maneələri keçə və marşrut qura bildiyini göstərib.

Naviqasiyada gəmi peyk məlumatlarından və öz avtonom avtomobillərindən istifadə edə bilər.

İstifadəyə verildikdən sonra gəminin tədqiqatlar, o cümlədən okean xəritəsinin hazırlanması, habelə patrul xidməti və su nümunələrinin təhlili üçün istifadə ediləcəyi gözlənilir.

Gəminin uzunluğu 88,5 m, eni 14 m, yerdəyişmə qabiliyyəti 2,1 min tondur. Orta sürət 13 düyün (24 km/saat), maksimal sürəti isə 18 düyün (33 km/saat) təşkil edir.

Mənbə: South China Morning Post