"Beynəlxalq Böhran Qrupu Ermənistan və Azərbaycan arasında gərginliyin bu il də davam edəcəyini proqnozlaşdırır".

Bu fikirləri Demokrat.az-a açıqlamasında siyasi şərhçi Əlimusa İbrahimov deyib. Ekspert hesab edir ki, proqnoza əsasən, müharibənin başvermə ehtimalı yüksəkdir:

"Artıq növbəti beynəlxalq təşkilatdır ki, 2023-cü ildə Azərbaycanla Ermənistan arasında yeni, qısamüddətli müharibənin baş verəcəyi barədə proqnoz verir. Bu tipli təşkilatların belə bir proqnozu Azərbaycanla Ermənistanın ötən il bir neçə dəfə növbəti müharibənin kandarından dönmələri ilə əlaqədardır. 2022-ci ildə genişmiqyaslı müharibədən qaçmaq mümkün oldu. Əgər Ermənistan bu ildə də özünü ötənilki kim aparsa, şübhəsiz müharibə qaçılmaz olacaq.

Ermənistanın yeritdiyi destruktiv siyasətin sonda müharibəyə gətirib çıxaracağını proqnozlaşdırmaq üçün ciddi siyasi təhlillərə ehtiyac yoxdur. Çünki hamıya məlumdur ki, artıq Azərbaycan Ermənistan hakimiyyətinin danışıqlar prosesini məqsədyönlü şəkildə pozmaq istiqamətində atdıqları addımlara dözməyəcək. Mən də müharibə ehtimalının çox yüksək olduğunu düşünürəm. Eyni zamanda, hesab edirəm ki, Azərbaycanın əlində müharibəyə qədər yetərli mexanizmlər var və biz hələ bu vasitələrdən istifadə etməyə çalışacağıq. Düşünürəm ki, sonda Ermənistanı bizimlə razılaşmaqdan başqa çıxış yolunun olmadığını başa sala biləcəyik".