Türkiyə ilə Suriya arasında 11 ildən sonra ikinci mərhələyə keçməsi planlaşdırılan danışıqlarla bağlı Suriya prezidenti Bəşər Əsəddən açıqlama gəlib. Prezident Ərdoğanla görüşmək şərtini qoyan Əsəd Türkiyədən Suriyanın şimalındakı əməliyyatlara son qoymasını tələb edib.

Publika.az xəbər verir ki, Rusiyanın paytaxtı Moskvada müdafiə nazirləri səviyyəsində keçirilən görüşdən sonra Türkiyə ilə Suriya arasında yeni təmasın qurulub-qurmayacağı maraq mövzusu olub. Xarici işlər naziri Mövlud Çavuşoğlu fevralın əvvəlində Türkiyə-Suriya-Rusiya görüşünün ola biləcəyini bəyan edib və mövzu ilə bağlı Əsəddən açıqlama gəlib.

Rusiya prezidenti Vladimir Putinin Suriya üzrə xüsusi nümayəndəsi Aleksandr Lavrentyevlə paytaxt Dəməşqdə görüşən Əsəd, xarici işlər nazirləri və dövlət başçıları səviyyəsində kəşfiyyat rəhbərləri və müdafiə nazirlərini bir araya gətirərək davam etdirilməsi planlaşdırılan üçtərəfli danışıqlardan danışıb. Bəşər Əsəd Türkiyə-Suriya-Rusiya nümayəndələri arasında danışıqların konkret nəticə verməsi üçün şərtləri təqdim edib.

"Bu cür danışıqlar məhsuldar olmaq və Dəməşqin gözlədiyi konkret hədəflərə çatmaq üçün Rusiya və Suriya arasında əvvəlcədən razılaşdırılmış və planlaşdırılmış şəkildə hazırlanmalıdır", - deyə Əsəd bəyan edib.

Bəşər Əsəd bildirib ki, prezident Ərdoğanla görüşmək üçün Türkiyə Suriyanın şimalındakı əməliyyatları dayandırmalıdır.