Fransa səfiri Parisdəki aksiyalar zamanı anti-Türkiyə təbliğatı ilə bağlı Türkiyə Xarici İşlər Nazirliyinə çağırılıb.

Publika.az xəbər verir ki, bu barədə "RİA Novosti"yə Ankaradakı diplomatik mənbə məlumat verib.

“Fransanın Ankaradakı səfiri Erve Maqro bu gün Türkiyə Xarici İşlər Nazirliyinə çağırılıb və PKK/PYD/YPG dairələrinin dekabrın 23-də Parisdə bir fransızın hücumu bəhanəsi ilə ölkəmizə qarşı başlatdığı qara təbliğata münasibətimiz ifadə olunub. Fransanın hökumət rəsmilərinin və bəzi siyasətçilərin bu təbliğatda iştirakı və reaksiyamız diqqətə çatdırılıb. Bu məsələ ilə bağlı münasibətimiz Parisdəki səfirliyimiz tərəfindən də Fransanın müvafiq orqanlarına bildirilib”, - mənbə bildirib.

Onun sözlərinə görə, səfir Maqro Ankaranın mövqeyi ilə bağlı məlumatlandırılıb. Qeyd olunub ki, Fransa hökuməti və ictimai rəyi üçün terror təşkilatının Paris küçələrində törətdiyi zorakılıq aktlarını düzgün təhlil etmək faydalı olardı.

Qeyd edək ki, dekabrın 23-də Parisin 10-cu rayonunda kürdlərin mədəniyyət mərkəzinin yaxınlığındakı küçədə 69 yaşlı kişi atəş açıb, o, saxlanılıb. Atışma nəticəsində 3 nəfər həlak olub. Kürd icması nümayəndəsinin "RİA Novosti"yə verdiyi məlumata görə, üç kürd fəal öldürülüb. Paris prokurorluğu qətl işi ilə bağlı istintaqa başlayıb.

Şənbə günü günortadan sonra minlərlə kürd Parisdəki Respublika meydanına toplaşaraq, kürd icmasına qarşı terror hücumu hesab etdikləri atışmaya etiraz ediblər. Etirazçılar atışmanın arxasında Türkiyənin dayandığını düşünür və Türkiyə əleyhinə şüarlar səsləndirirlər.

Nümayiş dinc şəkildə başlayıb, lakin qəfildən qəzəbli izdiham yoldan keçən maşınlara doğru qaçıb və talanlar təşkil etməyə başlayıb. Etirazçıların özləri arasında da bir neçə dəfə dava düşüb. Daha sonra əl-ələ verib zəncir yaradaraq küçələri bağlamağa başlayıblar.

Sonradan vəziyyət daha da gərginləşib: etirazçılar avtobus dayanacaqlarını, avtomobilləri aşırmağa, mebel və zibil qutularını yandırmağa başlayıblar.