Xəbər verildiyi kimi, erməni separatçıları Xankəndidə növbəti dəfə mitinq keçiriblər. Mitinqə çıxış edən separatçı rejimin “dövlət naziri”, milyarder Ruben Vardanyan gərginliyin artmasına xidmət edən açıqlamalar verib.

“Cəmi üç yolumuz var. Birincisi, tabe oluruq və gec-tez Azərbaycana inteqrasiya edirik, ikincisi, çıxıb gedirik, üçüncü yol isə qalıb mübarizə aparmaqdır. Mən sentyabrın 12-də seçimimi etdim, buradayam, döyüşürəm və buradan getməyəcəyəm” - Vardanyan deyib.

Maraqlıdır ki, keçirilən bu aksiya MDB dövlət başçılarının bu gün Sankt-Peterburqda keçililən qeyri-formal görüşü ərəfəsində baş verib.

Onu da qeyd edək ki, oktyabrın 30-da da separatçılar Xankəndidə mitinq təşkil etmişdilər. Həmin aksiya da oktyabrın 31-də Rusiya, Azərbaycan və Ermənistan liderləri arasında Soçidə olan görüş ərəfəsi baş vermişdi.

Bu dəfəki aksiyada Vardanyanın əhalini “mübarizəyə” səsləməsi əslində terrora çağırış olmaqla yanaşı, Azərbaycana qarşı müharibə elan etmək deməkdir.

Gundem.az xəbər verir ki, Bizim.Media-ya açıqlamasında Milli Məclisin deputatı Elman Nəsirov qeyd edir ki, Vardanyanın mitinqdə səsləndirdiyi fikirlər regionda gərginliyin artırılmasına xidmət edir:

“Ruben Vardanyan çalışır ki, özünü beynəlxalq ictimai fikrə Qarabağdakı erməni icmasının lideri kimi təqdim etsin. Atdığı bütün təxribatçı addımlar da ona yönəlib. Onun bu addımları regionda sülhə, təhlükəsizliyə təhdiddir, Azərbaycanla Ermənistan arasında münasibətlərin normallaşması prosesinə arxadan zərbədir. Mitinqə bəzilərini təzyiq və təhdid altında gətiriblər. Xüsusən də müəllim və həkimlərdən bu cür istifadə ediblər. Kimlərisə 30-40 dollar, kimlərə də avtomobili üçün benzin alacağı vədini veriblər. Onlar “kökə və qamçı” siyasətindən istifadə etməklə belə bir mitinq təşkil ediblər”.

Deputatın fikrincə, Vardanyanın dedikləri müharibəyə çağırışdır:

“Mitinqdə Vardanyan təxribatçı mövqe ortaya qoyaraq, 3 yolun olduğunu deyib. Onun üçüncü yol kimi dəyərləndirdiyi “mübarizə” yolu faktiki olaraq müharibə anonsu kimi qiymətləndirilə bilər. Vardanyan özünü ermənilərin lideri kimi təqdim etmək istəyir. Bu kontekstdə istisna deyil ki, yaxınlarda Araik Arutunyan iflasa uğrayacaq. Hətta gələcəkdə Vardanyanın Paşinyanın yerinə iddialı olması fonunda, onunla Ermənistanın hazırlı baş naziri arasında növbəti konflikin yaşanacağı da istisna deyil”.

E. Nəsirov bildirir ki, bu sayaq təxribatçı bəyanatlar nəticə etibarı ilə gözlənilən sülh prosesinə ciddi təhlükə yaradacaq:

“İlin sonuna sülh müqaviləsi istiqamətində müəyyən addımların atılmasının gözlənildiyi bir məqamda, Vardanyanın son davranışı həmin məsələ ətrafında yaranan kövrək ümidlərin də üzərindən xətt çəkir. Bu reallıqda Azərbaycanın Türkiyə ilə birgə keçirdiyi hərbi təlimlər, onun kəmiyyət və keyfiyyət göstəricilərində artımın olacağını da proqnozlaşdırmaq olar. “Dəmir yumruq” yerindədir. Ermənistan bunu unutmasın”.