"Bu gün Şuşa-Xankəndi yolunda bir qrup soydaşımızın Laçın dəhlizindən qeyri-qanuni istifadə olunması, bölgədəki ekoloji terrorun davam etməsi və burada sülhməramlıların da qanunsuzluqlara bir parça olması istiqamətində Qeyri Hökümət Təşkilatlarının (QHT) və ictimai fəalların etirazları qeydə alındı".

Bunu Milli.Az-a açıqlamasında Sosial Tədqiqatlar Mərkəzinin Daxili siyasətin təhlili departamentinin sektor müdiri, politoloq İlyas Hüseynov deyib.

O bildirib ki, Azərbaycan üçün əsas məsələ ərazi bütövlüyü, suverenlik, sərhədlərin toxunulmazlığı və etnik ermənilərin Azərbaycan cəmiyyətinə reinteqrasiyasıdır:

"Məhz sülhməramlıların komandanı general-mayor Andrey Volkovun əraziyə çağırılması ilə bağlı tələblər də yerinə yetirilmədi. Çünki bir müddət öncə məhz Volkov azərbaycanlı ekoloqların ərazidə monitorinq aparması ilə bağlı razılıq vermişdi.

Ardınca separatçıların etnik ermənilərdən istifadə etməklə yolu bağlamaq cəhdləri bu monitorinq missiyasının həyata keçirilməsinə mane oldu. Bu səbəbdən ekoloji terrorun geniş vüsət almasına qarşı QHT-lər Xankəndi-Şuşa yolunu bağladılar və burada da xoşagəlməz hallar müşahidə olundu.
Ətraflı

İlk növbədə sülhməramlıların QHT nümayəndələri ilə, ictimaiyyətlə, jurnalistlərlə kobud davranışı yenə də davam etdi. Jurnalistləri suallarını cavablandırmaq üçün sülhməramlıların arasından çıxan bir polkovnik də içkili vəziyyətdə idi. Eyni zamanda bir müddət əvvəl Azərbaycan mediasında yayılan xəbərlər də öz təsdiqini tapdı. Çünki sülhməramlılar içərisində ermənilər də mövcuddur və bu faktı artıq heç kim inkar edə bilməz. Çünki ekspertlərdən biri ermənicə danışan sülhməramlıya müraciət etdi, o da yalnız gizlənməyə çalışdı.

Azərbaycan tərəfi növbəti dəfə nümayiş etdirir ki, öz ərazisində sərbəst hərəkət etmək hüququna malikdir. Biz bu hüququmuzu maksimum dərəcədə istifadə edirik və bizim üçün əsas məsələ ərazi bütövlüyü, suverenlik və sərhədlərin toxunulmazlığı, etnik ermənilərin Azərbaycan cəmiyyətinə reinteqrasiyasıdır.

Müxtəlif güclər sülh prosesinə qarşı çıxsalar da, sülhməramlılar azərbaycanlı ekoloqları əraziyə buraxmasalar da Azərbaycan öz istəyinə çatacaq. Artıq çadrların qurulması da onu deməyə əsas verir ki, bu aksiyalar bundan sonra da davam edəcək və bu fəaliyyətin müşahidə olunması həm də çox yaxşı düşünülmüş taktiki bir gedişdir. Çünki Azərbaycan ordusu da kənardan prosesləri izləyir.

Hələ mülki missiyalar fəaliyyətdədir. Gələcəkdə bu mülki missiyalar öz nəticəsini verməsə hərbi müdaxilə də işə düşə bilər".