“44 günlük Vətən Müharibəsindəki şanlı qələbəmizdən iki il ötür. 2020-ci ilin 27 sentyabrından başlayan və 44 gün davam edən Vətən Müharibəsi mədəniyyət simvolumuz, incəsənət beşiyimiz Şuşanın işğaldan azad olunması ilə bitdi. Ermənistan çıxılmaz vəziyyətdə qaldığını görərək kapitulyasiya aktının imzalanmasına razılıq verdi. Eyni zamanda, Azərbaycan Ordusu bir güllə atmadan, bir şəhid vermədən Ağdam, Kəlbəcər və Laçın rayonlarını işğaldan azad etdi”.

Bunu Publika.az-a açıqlamasında politoloq İlyas Hüseynov deyib.

Politoloq bildirib ki, Vətən Müharibəsində zəfər qazanan Azərbaycanda son iki il ərzində vətəndaşlarımızın da əhval-ruhiyyəsi dəyişib:

“Eyni zamanda, beynəlxalq aləmdə ölkəmizə münasibətin dəyişdiyini görürük. Bunun nəticəsidir ki, Azərbaycan həm Şərqdə, həm də Qərbdə sayılıb-seçilən ölkələrdən birinə çevrilib. Ali Baş Komandan, cənab İlham Əliyevi dünyanın ən mötəbər tədbirlərinə dəvət edirlər. Cənubi Qafqazda sülh quruculuğu prosesi ilə bağlı ona suallar ünvanlayırlar. Eyni zamanda, Vətən müharibəsi dövründə cənab prezident İlham Əliyev dünyanın aparıcı kütləvi informasiya vasitələrinə çoxsaylı müsahibələri ilə Azərbaycan həqiqətlərinin dünya ictimaiyyətinin diqqətinə çatdırılmasında əsas sima kimi iştirak edirdi. Eyni zamanda, erməni təbliğat maşınının darmadağın olunmasında fəal rol oynadı”.

Ekspertin fikrincə, Azərbaycan Silahlı Qüvvələri, diplomatiyamız, bütün dünyada olan azərbaycanlılar bir yumruq kimi birləşərək Dəmir Yumruğu təşkil etdilər:

“Bunun nəticəsində Azərbaycan tarixi qələbə qazandı. Biz işğaldan azad edilmiş ərazilərdə sürətli yenidənqurma və bərpa işləri aparırıq. Əsas məsələ keçmiş məcburi köçkünlərimizin təhlükəsiz şəraitdə öz evlərinə, doğma yurd-yuvalarına qayıtmasını təşkil etməkdir. Bunun uğrunda bu gün siyasi mübarizə aparılır. Sərhədlərin delimitasiyası, iqtisadi və nəqliyyat əlaqələrinin bərpa olunması, eləcə də sülh müqaviləsinin imzalanması bu gün danışıqların əsas predmetini təşkil edir. Düşünürəm ki, Şuşa zirvəsinin fəth edilməsi və onun Azərbaycana qaytarılması dünyanın hərb tarixinə düşəcək bir hadisədir. Artıq bu gün Şuşada mötəbər tədbirlər keçirilir. Xarıbülbül Beynəlxalq Musiqi Festivalı, Vaqif Poeziya Günləri və digər siyasi-iqtisadi, sosial-mədəni tədbirlər Şuşamızın füsnkar təbiəti ilə təmas qurmağa imkan yaradır. Eyni zamanda, yeni geosiyasi reallığın təbliğatı bu tədbirlər vasitəsi ilə həyata keçirilir”.