Şimali Koreya bu gün “Donetsk Xalq Respublikası”nın müstəqilliyini tanıyıb.

Publika.az xəbər verir ki, bunu qondarma “DXR”in başçısı Denis Puşilin bildirib.

D.Puşilin bunu “respublika diplomatiyasının daha bir qələbəsi” adlandırıb.

“Koreya Xalq Demokratik Respublikası bu gün Donetsk Xalq Respublikasını tanıdı. Donetsk Xalq Respublikasının beynəlxalq statusu və dövlətçiliyi möhkəmlənməkdə davam edir. Bu, bizim diplomatiyamızın növbəti qələbəsidir”, – deyə D.Puşilin özünün Telegram-kanalında yazıb.

Xatırladaq ki, “Donetsk və Luqansk xalq respublikaları” hələ 2014-cü ildə Ukraynadan ayrılaraq özlərini müstəqil dövlət elan ediblər. 2022-ci ilin fevralında onların suverenliyi Rusiya tərəfindən tanınıb.

“DXR” indiyədək Rusiya ilə yanaşı Suriya tərəfindən də müstəqil dövlət kimi tanınırdı.