Ukrayna və Polşa hökumətləri hərbi texnika istehsalı üzrə birgə müəssisənin yaradılması haqqında memorandum imzalayıblar.

Publika.az "CNN"ə istinadla xəbər verir ki, bu barədə Ukraynanın Baş naziri Denis Şmıqal Polşa ilə hökumətlərarası məsləhətləşmələrin yekunlarına dair brifinq zamanı bildirib.

O qeyd edib ki, Ukrayna və Polşa, həmçinin sərhədyanı əməkdaşlığı da gücləndirmək barədə razılığa gəliblər:

"Bu, bizim müdafiə və hərbi əməkdaşlığımızı yeni səviyyəyə çıxaracaq və müasir müdafiə silahlarının yaradılmasına imkan verəcək. Əldə edilən razılığa əsasən ölkələrimiz dövlət sərhədinin Ukrayna-Polşa hissəsində nəzarət-buraxılış məntəqələrinin fəaliyyətinin səmərəliliyinin artırılması məqsədilə əməkdaşlıq intensivləşdiriləcək. Bunun üçün Ukrayna-Polşa işçi qrupu yaradılıb və iyun ayında Korçova-Krakovets sərhəd-keçid məntəqəsində birgə nəzarət-buraxılış məntəqələrinin artırılmasına yönəlmiş pilot proqrama başlanılacaq".