Ukrayna 15 il ərzində Krımın statusu və onun tabeliyi ilə bağlı Rusiyaya sazişlər hazırlamağı təklif edir.

Publika.az xəbər verir ki, bu barədə bu gün Rusiya nümayəndə heyəti ilə İstanbulda baş tutan danışıqlardan sonra Ukrayna Prezident Aparatının rəhbərinin müşaviri Mixail Podolyak məlumat verib.

O bildirib ki, Ukrayna nümayəndə heyəti Rusiya ilə aparılan danışıqlarda Krımın və Sevastopolun statusu məsələsinin atəşkəs razılaşmasının ayrıca bəndinə salınmasını təklif edib.

“Krıma gəlincə, bu, sazişin ayrıca bəndidir və burada Krımın və Sevastopolun statusu ilə bağlı ikitərəfli danışıqlar aparmaq üçün Ukrayna və Rusiyanın mövqeyini 15 il müddətinə müəyyən etməliyik” - Podolyak qeyd edib.

Podolyak bütün bu dövr ərzində tərəflərin silahlı qüvvələrdən istifadə etməyəcəklərinə dair təminat verilməsinin vacibliyini vurğulayıb.

Qeyd edək ki, Rusiya Prezidenti Vladimir Putin dəfələrlə Krım məsələsinin onlar üçün əbədi olaraq qapandığını bildirib.