"Anlamaq lazımdır ki, Ermənistanla Azərbaycan arasında sərhədi müəyyən etmək üçün sovet xəritələrinin kifayət qədər hüquqi əsası var".

Redaktor.az "news.am"a istinadla xəbər verir ki, bunu Ermənistanın Baş naziri Nikol Paşinyan oktyabrın 27-də Ermənistan Milli Assambleyasının iclasında hökumət saatında müxalifətdə olan “Ermənistan” blokundan olan deputat Armenuhi Kyuregyanın sualını cavablandırarkən deyib.

Paşinyanın sözlərinə görə, Rusiya Prezidenti Vladimir Putinin əvvəllər qeyd etdiyi delimitasiya xəritələri “Ermənistanın inzibati-ərazi bölgüsü haqqında” qanunda təsvir olunan sərhədlərlə 100 faiz olmasa da, ən azı 99 faiz üst-üstə düşür.

“Onlar təxminən ittifaq respublikalarının xəritələri ilə üst-üstə düşür. Başqa bir məsələ, bu xəritələrdən hansının sərhədi təyin etmək üçün başlanğıc nöqtəsi ola biləcəyini başa düşməlisiniz. Axı ittifaq respublikaları arasında sərhədlər dəfələrlə dəyişib. Bu dəyişikliklər müxtəlif səbəblərə görə edilə bilər. O da ola bilərdi ki, Sov.İKP MK-nın növbəti plenumuna kimi rayonlardan birinin rayon soveti, məsələn, otlaq sahəsini qonşu respublikanın qardaş rayonuna və ya əksinə verdi. Xəritələrin necə dəyişdiyini, nə vaxt və niyə dəyişdiyini başa düşməliyik", - deyə hökumət başçısı bildirib.