“İmişli sakinləri çox xeyirxahdır, ürəkləri təmizdir, safdır. İmişli rayonundan olduğum üçün bu, mənim üçün xoşdur. Rayonda insanların sosial problemləri həddindən artıq çoxdur. Azərbaycanda sosial problemlərin həlli ən vacib məsələlərdəndir. “Uşaq pulu”nun verilməsi vacib faktora çevrilib. Təbliğatımı “uşaq pulu” üzərində qurmuşdum".

Pravda.az-ın xəbərinə görə, bunu 79 saylı İmişli seçki dairəsindən lider namizəd elan edilən Razi Nurullayev deyib.

“Valideynlər aldıqları kiçik əməkhaqqı ilə uşaqlarını sağlam böyüdə bilmirlər, çox əziyyət çəkirlər. Ünvanlı sosial yardımın verilməsi ilə bağlı problemlər qabardılıb. Həmin problemlər bu gün də var. Ehtiyacı olan ailələr ünvanlı sosial yardım ala bilmirlər, bundan imkanlı ailələr daha çox istifadə edir. Ona görə də ünvanlı sosial yardım ləğv edilməli, “uşaq pulu” isə bərpa olunmalıdır. İnsanların ciddi şəkildə maliyyə, pul problemləri var. Yeni iş yerlərinin yaradılmasına da ehtiyac var. Hər bir ailəyə sosial kreditin verilməsi də mühüm məsələdir” – R.Nurullayev qeyd edib.