2020-ci ilin ilk aylarında İrəvan və Xankəndidə Qarabağ məsələsinin həllinə dair bir-birinə zidd fikirlərin səslənməsi tezliyi artmaqdadır.

Moderator.az xəbər verir ki, işğalçı ölkə Xarici İşlər nazirinin keçmiş müavini, fövqəladə və səlahiyyətli səfir Arman Navasardyan Ermənistan nəşrlərindən birinə verdiyi müsahibəsində baş nazir N.Paşinyanın mövqeyini tənqid edərək deyib:

“2018-ci ildən bəri baş nazir Nikol Paşinyanın Qarabağla bağlı açıqlamalarının bir-birinə zidd olduğu müşahidə edilir. Çünki əvvəlcə, inqilabdan sonra Qarabağın danışıqlarda iştirak etməli olduğunu söylədi, sonra Ermənistan və Qarabağın münaqişə ilə bağlı mövqelərinin eyni olduğunu bildirdi, sonda isə “Qarabağ -Ermənistandır və nöqtə» - dedi. Belə gedişlər Ermənistan Respublikasının diplomatiyasında olmamalı, bir diplomatik kurs boyunca getməli və bu istiqamətdə işləməliyik. Əgər Qarabağ danışıqlarda iştirak edirsə, deməli, iştirak edir. Biz, sadəcə, başqa bir yolla gedə bilmərik. Yadınızdadırsa, ATƏT-in həmsədr ölkələrindən biri olan Rusiyanın xarici işlər naziri Sergey Lavrov bir müddət əvvəl bildirmişdi ki, Dağlıq Qarabağın razılığı olmadan məsələ həll oluna və müzakirə edilə bilməz. Türkiyə və Rusiya artıq bir dəfə - 1921-ci ildə Ermənistanın razılığı olmadan məsələni həll edib. Biz artıq bütün bunları keçmişik. İndi öz müqəddəratını təyinetmə hüququndan danışan dövlətin məsələsini onun razılığı olmadan digər iki dövlətin həll etməsi məntiqlidirmi?..” –deyə üzdəniraq erməni diplomat sual edib.

Ermənistan və Dağlıq Qarabağın hərbi-siyasi ittifaqa girə bilməsi haqda suala isə Navasardyan belə cavab verib:

“Bəli, bu gün buna hər zamankından daha çox ehtiyac var. Üstəlik, mənim dərin inamıma görə, Ermənistan və Qarabağ federasiya yaratmalıdır..."

P.S. Beynəlxalq super güclər Azərbaycan dövlətinin, xalqının və ordusunun son həddə güclü dirənişini görsələr, doğrudan da, Ermənistanın hay-küyünü nəzərə almadan Qarabağ məsələsini ədalətlə həllinə imkan yaradar, yəni Rusiya və Türkiyənin də razılaşmasıyla torpaqlarımızın azad edilməsinə səslərini çıxarmazlar...

Sultan Laçın