Brussellyoz - qorxusuz görünən qorxulu xəstəlik
Əvvəllər insanlar başqalarından gələn yoluxucu xəstəliklərdən ehtiyat edirdilərsə, zaman keçdikcə bu hal dəyişməyə başladı. "Quş qripi", "donuz qripi" və bu kimi heyvanlardan gələn viruslar dünyada yayıldıqca, ölüm halları artdıqca qorxulu xəstəliyin məhz insandan deyil, heyvandan keçə biləcəyini anlayan insanlar daha da ehtiyatlı olmağa başladılar. Lakin bu ehtiyat da heyvanlardan gələn bakteriyaların qarşısını ala bilmir. Çünki ona qarşı görülən tədbirlərdə zaman-zaman insan tənbəlliyi, qorxmazlığı üzündən axsamalar yaranır. Nəticədə isə bakteriyalara yoluxmaq qaçılmaz olur.
Belə yoluxulması qorxulu, lakin insanlar tərəfindən elə də təhlükəli qəbul edilməyən bakteriyalardan biri brüssell bakteriyasıdır. Bu bakteriya insanı şikəst edib ömürlük iş qabiliyyətindən məhrum etməyə qadirdir. Kifayət qədər məlumatı olmayan insanlar isə belə bakteriyalara fikir vermir, vaxtında müalicə almır. Nəticə isə acınacaqlı olur. Xüsusən kənd rayonlarında yayılma ehtimalı olan bakteriyanın səbəbi o ərazilərdə mal-qaranın saxlanılmasıdır. Brussellyoz heyvanlardan və ya onlardan hazırlanan qidalardan insanlara keçən mikrob növüdür. Xüsusən sümük və əzələlərlə bağlı olan, bununla yanaşı bədənin digər orqanlarını da zədələyən yüksək qızdırma ilə müşahidə olunan bir xəstəlikdir. Brussellyoz insanın digər orqanlarına ziyan vuraraq, meningitə, qaraciyərin böyüməsinə, dalağın zədələnməsinə gətirib çıxara bilir. İri mal-qaradan keçən bu mikroblar sterilizə edilməmiş süd istifadəsi zamanı da insanlara keçə bilir.[/b][b]