Tibb aləmində təəccüblü hadisə baş verib.

Publika.az xarici mətbuata istinadən xəbər verir ki, həkimlər qarın ağrısından şikayət edən yaşlı qadının bətnində 35 yaşlı “daş körpə” dölü aşkar ediblər. 73 yaşlı qadının mədəsinin rentgen müayinəsi zamanı təxminən 7 aylıq və 4,5 kq ağırlığında olan daş dölün şok görüntüləri ortaya çıxıb.

Mütəxəssislər əlcəzairli qadının daşlaşmış körpəni 35 il özü də fərqinə varmadan qarnında gəzdirdiyini, lakin yenə də normal həyat sürdüyünü bildirib. Bildirilib ki, litopedion adlanan bu nadir bir vəziyyət, dölün hamiləlik dövründə öldüyü və bədən tərəfindən geri "sorulmayacaq" qədər böyük olduğu zaman meydana gəlir. Bu zaman ananı infeksiyaya səbəb olan ölü toxumadan qorumaq üçün döl daşlaşmağa başlayır.

ABŞ-ın Klivlend şəhərindəki Universitet Xəstəxanasının həkimi Dr. Kim Qarçi toxumadakı kalsifikasiyanın ananı infeksiyadan qoruduğunu, eyni zamanda dölün onilliklər ərzində aşkarlanmadan qala biləcəyini ifadə edib. O, bu barədə "ABC News"a danışıb.

"Royal Society of Medicine" jurnalında 1996-cı ildə dərc edilmiş məqaləyə görə, 290 litopediya hadisəsi sənədləşdirilib. Ən birincisi isə 1582-ci ildə qeydə alınıb.

Qeyd edək ki, 2009-cu ildə 92 yaşlı çinli Xuan İçzyunın yarım əsrdən artıq qarnında daşlaşmış döllə yaşadığı məlum olub. Analoji hadisə 2013-cü ildə kolumbiyalı yaşlı bir qadında da rastlanıb. Onun bətnində isə 40 yaşında daş körpə aşkarlanıb.