İnsanlar sosial şəbəkələrdə nə qədər çox vaxt keçirirlərsə, özlərini bir o qədər tənha hiss edirlər.

Teleqraf xəbər verir ki, Amerika alimləri bu qənaətə gəliblər.

Beylor Universitetinin araşdırması "Tədqiqat Personality and Social Psychology Bulletin" (PSPB) elmi jurnalında dərc olunub.

Komanda rəqəmsal vərdişlərin insan həyatına təsirini öyrənmək üçün doqquz il ərzində yetkinlik yaşına çatmış təxminən 7000 holland barədə məlumatlarını təhlil edib.

Nəticələr göstərib ki, sosial mediadan həm passiv (yalnız xəbər lentini gözdən keçirmə), həm də aktiv (paylaşma və ünsiyyət) istifadə tənhalıq hissini artırır. Ekspertlər iddia edirlər ki, onlayn ünsiyyət sosial tələbatların ödənilməsi üçün zəruri olan canlı ünsiyyəti əvəz edə bilməz.

Tədqiqatın müəlliflərindən biri, professor Ceyms Roberts deyib: "Sosial şəbəkələr onlayn icmalara çıxış təklif edir, lakin onların həm aktiv, həm passiv istifadəsi tənhalığı nəinki azaltmır və hətta əksinə, onu artıra da bilər".

Alimlər ikitərəfli əlaqəni də tapıblar: tənha insanlar sosial mediaya daha çox müraciət edirlər, lakin bu, onların vəziyyətini daha da pisləşdirir.

Tədqiqatçılar psixi sağlamlıq üçün zəruri olan canlı ünsiyyətin əhəmiyyətini vurğulayıblar. Onlar bundan sonra da rəqəmsal vərdişlərin təsirinin öyrənilməsinin vacib olduğunu bildiriblər.