Limonlu suyun tərkibində möcüzəvi arıqlama iksiri olması fikri doğru deyil.

Milli.Az xəbər verir ki, bu barədə endokrinoloq Anna Krivoşeyeva "Ura.ru"ya verdiyi müsahibədə deyib. Həkim bildirib ki, səhər limonlu su içmək sizi artıq çəkilərdən xilas etməyəcək. Bununla belə, onun aşağı kalorili olması kimi potensial faydaları var.

"Yarım limonun suyunu suya sıxsanız, hər stəkan limonlu suyun tərkibində cəmi 6 kalori var. Bu səbəbdən yüksək kalorili qazlı içkiləri və meyvə sularını limonlu su ilə əvəz etmək, ümumi kalori qəbulunun azalmasına səbəb ola və arıqlamağa kömək edə bilər", - Krivoşeeva izah edib.

Həmçinin həkimin fikrincə, bəzi tədqiqatlar göstərib ki, yeməklə birlikdə aşağı kalorili içkilər içmək qəbul edilən kalorilərin ümumi sayını azalda bilər. Limonlu suyun başqa bir faydası da budur ki, bu içki bədənin su balansını qorumağa kömək edir. Ekspert əlavə edib ki, içkinin faydalı xüsusiyyətləri əslində sudan qaynaqlanır.

"Limon hiyləsi adi suyun dadını sevməyən insanlara daha çox içməyə kömək edə bilər, lakin siz ona portağal və ya laym da əlavə edə bilərsiniz. Limon suyunun yalnız səhərlər və müəyyən temperaturda içilməsi barədə deyilənlər mifdir. Amma mədə-bağırsaq xəstəlikləri (mədə xorası, yüksək turşuluğu olan qastrit) və sitrus meyvələrinə allergiyası olan insanlar üçün bu içki xüsusilə acqarına əks göstərişdir.

Suya limon əlavə etmək, suyunuza limon dadını verəcək və bəlkə də sizi bir az daha çox içməyə vadar edəcək. Amma bu, birbaşa arıqlamağa səbəb olmayacaq. Əgər arıqlamaq istəyirsinizsə, yalnız su və limonla suyun birləşməsinə etibar etməyin. Effektiv arıqlamaq üçün balanslaşdırılmış qidalanma və müntəzəm məşq lazımdır", - həkim yekunda vurğulayıb.