İlanlar "dünyanın ən təhlükəli canlıları" siyahısında ilk yerlərdən birini tutur. Bütün dinlərdə ilanla bağlı hekayətlər var. Adəmlə Həvva hadisəsini bilməyən olmaz. "Tövrat"da yazılır ki, ilan ən hiyləgər heyvandır. Şeytan bütün gücünü istifadə edib ilanı yoldan çıxarır. Elə ki, şeytan cənnətə girir, burda da dinc durmur. Başlayır Adəmi yoldan çıxarmağın üsullarını axtarmağa. Nəhayət, tapır. Adəmə qadağan olunan meyvədən yedizdirir. Adəm bu günahına görə cənnətdən qovulur. Tanrı ilana qəzəblənir və deyir: "Madam ki, şeytanı sürünərək cənnətə soxdun, qiyamətədək sürünməlisən". Həmin gündən ilanlar sürünməyə başlayıb. Bu rəvayətin islama aid olmadığı söylənir. Amma, islami kitablarda da Adəmin qovulmasının günahkarı kimi ilan qeyd olunur. Təkcə "Quran"da ilan yox, şeytan günahlandırılır.
İlanlarla bağlı rəvayətlər çoxdur. Heç bir din və ya peyğəmbər səbəb olmadan bir canlını öldürməyi əmr etməz. Heyvanları öldürməklə bağlı söylənən rəvayətlərin ya peyğəmbərlərlə heç bir əlaqəsi yoxdur, ya da söylənərkən hansısa detalda səhv vardır. Dində yalnız insana hücum edən ilanların öldürülməsinə icazə verilir. Evdə, insanlarla birgə yaşayan, zərərsiz ilanların öldürülməsi isə günahdır. Zərərli ilan dedikdə onların zəhəri, yaxud hücum etməyi nəzərdə tutulur. Bəzən bir damcı ilan zəhəri insanı iflic edə, öldürə bilir.
İlan sizə hücum etmirsə, sakitcə sürünüb getməsinə icazə verin. Unutmayın, hər canlının ekoloji nizam-intizamda öz xüsusi yeri var. Yalnız həyatınızı xilas etmək üçün ilan öldürə bilərsiniz. O da, hamısını yox, həyatınızın üçün təhlükə hesab olunanı.
Harda ilan görsəniz, tez ətrafdakılara xəbər edin ki, heç kimə ziyanlığı toxunmasın. İslamda da deyilir ki, ətrafındakı insanları təhlükəsizliyinə çalışmalı, onları hər cür bəladan qorumalısan.
İndi isə sizə baş verən bir hadisədən danışacağam. Həzrəti Məhəmməd namaz qılarkən ona arxadan bir ilan yaxınlaşır. İstəyir ki, arxadan peyğəmbəri vursun. Yaxınlıqdan keçən bir pişik qaçaraq gəlib özünü ilanın üstünə atır və ilanı boğub öldürür. Məhəmməd peyğəmbər onun canını xilas edən pişiyin kürəyini sığallayır. Həmin gündən bəri də pişiklər heç vaxt yerə arxası üstə düşmür.
Namaz qılarkən hücum edən ilanı və ya əqrəbi öldürmək günah sayılmır. Camaat namazında kimsə əlinə ayaqqabı alıb əqrəbi və ya ilanı öldürmək üçün imamın qarşısına keçsə də onun namazı pozulmur.