Aeroterapiya - açıq, təmiz havanın təsirindən müalicə və profilaktik məqsədlə istifadə edilməsidir, klimatterapiyanın əsasıdır. Aeroterapiyanın fizioloji və müalicəvi təsiri orqanizmin oksigen ilə yaxşı təmin edilməsi ilə bağlıdır. Açıq alanlarda hava - aeroionlarla, ozonla, terpenlərlə, oksigenlə zəngin olur.
Toxumalara daxil olan oksigen orqanizmdə oksidləşmə reduksiya proseslərini aktivləşdirir və normallaşdırır. Bu isə təbii oksigenterapiyanı aeroterapiya adlandırmağa imkan verir.
Mənzərəli yerlərdə isə aeroterapiya həm də psixoemosional təsirə malik olur və əhval-ruhiyyəni, orqanizmin reaktivliyini, MSS fəaliyyətini artırır
İnsanın havasını, mühitini və göz mənzərəsini dəyişməyin orqanizmə olan müsbət təsiri dədə-babalarımıza da məlum olmuşdur. Daha qədimlərdən başlayaraq, təxminən 1986-cı illərin axırlarına qədər Azərbaycanın əksər rayonlarında insanlar təxminən 3 ay müddətinə yaşayış yerlərini dəyişərdilər.
Belə ki, may ayının sonundan başlayaraq, sentyabr ayının ortalarınacan ailəvi olaraq, istirahət etmək və havalarını dəyişmək məqsədilə bəziləri dağlıq ərazilərə, bəziləri də dəniz sahillərinə köçmüşlər. Əgər təsərrüfat heyvanları var idisə onları da aparar, müvəqqəti olaraq evlərdə və ya dağ ətəklərin-də dəyələr, çadırlar qurardılar...və beləcə bol oksigenin, bol günəşin, saf havanın, təbiətin və qidalarların təsirilə bədənləri möhkəmlənər, sinirləri sakit olar, ömürləri uzanardı...


Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından