Sidiklə şəkər testi: bu diaqnostika üsulu şəkərli diabet xəstəliyi ehtimalı olan xəstələr üçün edilirmiş. Belə ki, xəstəlik olması ehtimal edilən torpaq üzərinə sidik ifraz etməli imiş, əgər sidik üzərinə qarışqa yığılarsa deməli, sidikdə və məlumdur ki, onunla paralel olaraq da qanda şəkərin faizi yüksəkdir.
Sarımsaqla uşaqlıq borusunun keçiriciliyinin testi:
Təmiz şəraitdə qaynarlanmış bir parça tənzifin, nazık kətan əskinin içərisinə yenə təmiz və qaynarlanmış bir diş sarımsaq əzib qoyaraq uşaqlıq yoluna tampon yerləşdirilərmiş. Əgər bir müddət sonra boğazın, udlağın yuxarı içəri tərəfindən sarımsaq dadı gələrmişsə demək uşaqlıq borularının hər ikisi açıqdır və ya sağda dad hiss edilərsə sağ boru, solda hiss edilərdisə sol boru açıqdır.
Qədim Misirdə hamiləliyin və dölün cinsiyyətinin təyini
Hamiləlik ehtimalı olan qadın və hamiləlik ehtimalı olmayan qadın hər ikisi səhər ilkin sidiyi ilə əvvəlcədən qoyulmuş arpa və buğda torbalarını suvarırlarmış. Hamilə olan qadının sidiyi ilə suvarılan torba daha tez cücərirsə demək qadın hamilədir. Bu isə ilkin sidikdə həm də hamilə qadının sidiyində normadan çox hormon ifraz olması ilə əlaqədardır (bu faktdır). Eyni zamanda, sidiklə suvarma metodu ilə dünyaya gələcək uşağın cinsiyyəti də dəqiqləşirmiş. Belə ki, arpa daha tez cücərsə qız, buğda daha tez cücərsə oğlan uşağı olacaqmış.
Maraqlısı isə odur ki, hamilə olmayan qadının sidiyi ilə suvarılan buğdanın inkişaf etməməsi hazırda alimlər tərəfindən təsdiq edilmişdir.
Misirlilər ziyanvericilər və parazitlərlə də aktiv mübarizə apara bilirdilər. Bitlərdən qorunmaq üçün istər kahinlər, istər adi insanlar saçlarını çox qısa kəsər və ya qırxaraq repellent-lərdən istifadə etmişlər. Duz (NaCl) və sodadan (natrium bi-karbonat) hazırlanmış məhluldan istifadə edərək gənələrdən qorunmuşlar.
Tərin xoşagəlməz iyindən qurtulmaq üçün darçın və sitrusdan ilk dezodorantı da misirlilər hazırlamışdılar. Hətta çoxsaylı ətirlərdən, çiçəkləyən həmişəyaşıl bitkilərdən istifadə etməklə qoltuqaltına qoymaq üçün ətirli qranulalar hazırlayırdı-lar.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından