Qlaukoma, yəni göz təzyiqi, uzun müddət heç bir əlamət vermədən inkişaf edə bilən və müalicə olunmadıqda görmə itkisinə səbəb olan təhlükəli göz xəstəliklərindən biridir. Mütəxəssislər bildirirlər ki, xəstəlik çox vaxt gec mərhələdə aşkar olunur.

E-saglam.az xəbər verir ki, oftalmoloq Prof. Kazım Devranoğlunun sözlərinə görə, qlaukoma dünyada kataraktdan sonra korluğun ikinci ən yayılmış səbəbidir. Türkiyədə təxminən 2,5 milyon insanın bu xəstəlikdən əziyyət çəkdiyi, lakin xəstələrin böyük hissəsinin bundan xəbərsiz olduğu qeyd edilir.

Mütəxəssis bildirib ki, qlaukoma görmə sinirinə zərər verir və ilkin mərhələlərdə adətən ağrı yaratmır. Xəstəlik irəlilədikcə görmə sahəsi tədricən daralır və yalnız son mərhələlərdə nəzərə çarpan görmə zəifləməsi yaranır. Buna görə də erkən diaqnoz böyük əhəmiyyət daşıyır.

Həkimin sözlərinə görə, sağlam insanlarda göz təzyiqi adətən 12–20 mm civə sütunu arasında olur. Daha yüksək göstəricilər qlaukoma riskindən xəbər verə bilər. Lakin təzyiq gün ərzində dəyişə bildiyi üçün dəqiq diaqnoz üçün müntəzəm nəzarət vacibdir.

Qlaukoma riskini artıran amillər arasında diabet, hipertoniya, yüksək xolesterol, metabolik xəstəliklər və uzun müddət kortizon istifadəsi yer alır. Ailəsində qlaukoma olan şəxslərə hər il göz müayinəsindən keçmək tövsiyə edilir.

Mütəxəssislər vurğulayırlar ki, 40 yaşdan sonra hər kəs, heç bir şikayəti olmasa belə, mütəmadi göz müayinəsi etdirməlidir. Çünki vaxtında aşkarlanan qlaukomanın dərman, lazer və ya cərrahi üsullarla nəzarətdə saxlanılması mümkündür.

Həkimlər həmçinin stress, yuxusuzluq və uzun müddət telefon, planşet və kompüter istifadəsinin də xəstəliyin gedişinə mənfi təsir göstərə biləcəyini bildirirlər.