Elmi araşdırmalar göstərir ki, hər kəs öz əhvalını yaxşılaşdırmağı öyrənə bilər. Bunun üçün beyninizi məşq etməli olacaqsınız.

“Medicina” xəbər verir ki, XX əsrdə hesab edilirdi ki, insan beyni 25 yaşa qədər tam formalaşır və bu yaşdan sonra artıq inkişaf edə bilmir. Amma nevrologiyanın inkişafı göstərdi ki, insanın həyatı boyu beyində yeni sinir əlaqələri yarana bilər. Onu da bilirik ki, insan xoş bir şey haqqında fikirləşirsə, beyni xoşbəxtliyi qeyd edən sahədə daha fəallaşır. Bu depressiyanın müalicəsinin açarıdır.

İtalyan psixiatr professor Covanni Fava xəstələrini “xoşbəxtlik gündəlikləri” yazmağa təşviq edir.

O, kəşf edib ki, insan həyatında hansısa müsbət məqamı qələmə alan kimi bu hadisə dərhal beynində neyron kök salır. Getdikcə daha çox müasir psixoloqlar eyni texnikadan istifadə etməyə başlayırlar.

Onlar daimi stress və narahatlıq, sevilməyən iş və maliyyə qayğılarından əziyyət çəkən xəstələrlə qarşılaşırlar. Ancaq belə insanların həyatında hələ də sevincli anlar var.

Psixiatrlar depressiyanı müalicə edərkən diqqəti belə məqamlara yönəltməyi, hər hansı müsbəti görüb bunu yazılı şəkildə ifadə etməyi xahiş edirlər. Sözün əsl mənasında belə bir müalicədən bir neçə həftə sonra xəstələrin əhəmiyyətli bir hissəsi özlərini daha yaxşı hiss etməyə başlayır.

Məşhur həkim Stefan Klein "Xoşbəxtlik Elmi" kitabında deyir: "Bədbəxtlik bizə dəvətsiz gəlir, amma xoşbəxtlik üçün insan çox çalışmaq lazımdır!" Bunu öz təcrübələrindən dərk edənlər həyatlarını yaxşılığa doğru dəyişirlər.