Sıx iş tempi, gündəlik stress, zehni və fiziki yorğunluq bir çox insanın yuxu keyfiyyətinə mənfi təsir edir. Gecə rahat yata bilməmək və səhərlər yorğun oyanmaq artıq geniş yayılmış bir problemdir.

Milli.Az xəbər verir ki, mütəxəssislər bildirir ki, tərkibində melatonin olan bəzi təbii qidalar bu problemi kökündən həll edə bilər.

Böyük Britaniyanın "Benenden Health" qurumunda çalışan sağlamlıq mütəxəssisləri "The Mirror" qəzetinə açıqlamalarında bildiriblər ki, yalnız pəhrizdə ediləcək kiçik bir dəyişikliklə daha keyfiyyətli və dərin yuxu mümkündür.

Araşdırmalar göstərir ki, albalı təbii melatonin mənbəyi olaraq yuxuya getmə prosesini asanlaşdırır. Yatmazdan əvvəl albalı yemək və ya albalı suyu içmək yuxunun həm müddətini, həm də keyfiyyətini artırır.

"Albalı, tərkibindəki melatoninlə bədən ritmini nizamlamağa kömək edir. Axşam saatlarında bu meyvədən qəlyanaltı kimi istifadə etmək və ya təbii albalı suyu içmək, daha dərin və davamlı yuxu təmin edə bilər."

2018-ci ildə aparılan bir pilot araşdırmada, yuxusuzluqdan əziyyət çəkən yaşlı şəxslər 2 həftə boyunca yatmazdan 2 saat əvvəl və səhər saatlarında bir stəkan (240 ml) albalı suyu içiblər. Nəticədə onların ümumi yuxu müddətinin orta hesabla 84 dəqiqə artdığı müşahidə olunub.

Yuxu Keyfiyyətini Artıran Digər Qidalar

Benenden Health mütəxəssisləri yuxu keyfiyyətini artırmaq üçün yalnız albalıya deyil, aşağıdakı qidalara da üstünlük verilməsini tövsiyə edir:

Çiy bal , banan , badəm

Bu qidalar da melatonin istehsalını stimullaşdıraraq bədənin təbii yuxu mexanizmini dəstəkləyir.

Mütəxəssislər qeyd edir ki, bu cür təbii üsullarla yuxunu yaxşılaşdırmaq, uzunmüddətli və dərmansız bir həll ola bilər. Melatonini dəstəkləyən bu qidaların gündəlik rasiona əlavə olunması yalnız yuxu deyil, ümumi sağlamlıq üçün də faydalıdır.