Yeni Zelandiyada aparılan araşdırmalar göz sağlamlığı ilə erkən yaşda qocalıq və demans riski arasındakı əlaqəni ortaya qoyub.

Milli.Az xəbər verir ki, Otaqo Universitetinin alimləri müəyyən ediblər ki, gözün arxa hissəsində işığa həssas tor qişanın incəlməsi idrak qabiliyyətinin zəifləməsinə və sonrakı dövrlərdə demans riskinin artmasına səbəb ola bilər.

Araşdırmalara görə, bulanıq görmə, işığın yanıb-sönməsi, rəng qavrayışında dəyişiklik və görmə sahəsində ləkələr kimi simptomlar ilk siqnallar arasında yer alır. Xüsusilə tor qişada nazilmə müşahidə edilən şəxslərdə bu əlamətlər 60 yaşdan əvvəl, hətta 50-40 yaş aralığında belə demans əlamətlərinin ortaya çıxması ehtimalını artırır.

Tədqiqatçılar həmçinin göz damarlarında daralma və damar genişlənməsi kimi dəyişikliklərin də beyin dövranındakı problemlərin erkən əlaməti ola biləcəyini vurğulayıblar. Otaqo Universitetindən Dr. Ahleigh Barrett-Young bildirib ki, bu cür damar problemləri yalnız görmə orqanlarını deyil, beyindəki qan dövranını da zəiflədir. Bu isə infarkt, insult, yaddaş itkisi və idrak problemləri kimi ciddi nevroloji fəsadlara səbəb ola bilər.

Mütəxəssislər göz sağlamlığına diqqət etməyi, görmə dəyişiklikləri hiss edildikdə dərhal müayinədən keçməyi və erkən müdaxilə ilə risklərin azaldıla biləcəyini bildirirlər.