Xalq təbabətində əriklə müalicənin aşağıdakı reseptlərini istifadə edirlər. Ürək xəstəliklərində - 50 qr ərik qurusunun üzərinə 1 stəkan qaynar su əlavə edib, 3-4 saat dəmləndikdən sonra süzmək və yarım stəkan olmaqla gün ərzində içmək. Bir çay qaşığı xırdalanmış ərik tumunun üzərinə bir stəkan qaynar su əlavə edib, emulsiya halına düşənə qədər qarışdıraraq, alınmış məhlulu gün ərsində 2-3 dəfəyə içmək. Görmənin zəifləməsi - gündə 3 dəfə ¼ stəkan, 1-2 ay olmaqla, təzə çəkilmiş ərik şirəsi içmək xeyirlidir.
Ateroskleroz - 100 qr ərik qurusunu maşından keçirib, gündə 2-3 dəfə 1 x/q yemək məsləhətdir. Həmin miqdar qurtardıqdan 2 həftə sonra kursu bir neçə dəfə təkrarlamaq lazımdır. Ərik şirəsi eyni zamanda böyrək, sidik kisəsi, qanazlığı, sinir sistemi, ayaqların əzələlərinin yığılmasında, aşağı və ya tamam aşağı mədə şirəsi turşuluğunun çatmamazlığında, bağırsaq problemlərində çox xeyirlidir. Amma tərkibində 84% şəkər olduğuna görə şəkərli diabet zamanı, yüksək turşuluqla müşayiət olunan kəskin qastritlərdə, 12 b/b xəstəliklərində qəbulu yolverilməzdir. Bəzi qara ciyər və pakreas xəstəliklərində əriklə müalicədən uzaq olmaq lazımdır. Provitamin A və karotin əriyin tərkibində yüksək olduğuna görə hipotireoz zamanı da onun istifadəsi arzuedilməzdir. Əgər orqanizmdə vitamin A-ya ehtiyac varsa, o zaman medikamentoz, təmiz formada olan vitamindən istifadə etmək məqsədəuyğundur. Ac qarına, kababdan, şişlikdən, plovdan sonra ərik yemək, ərik yedikdən sonra isə soyuq su içmək məsləhət deyil. Ərik tumu sevənlərin isə diqqətinə çatdıraq ki, minlərlə növü olan, əsasən də yabanı bitən əriklərin tumunda sinil turşusu adlanan zəhərli maddə olur. Bir dəfəyə 20 qr artıq yeyilərsə zəhərlənmə ola bilər.
Ərik yağından və ərik tumundan saç və dırnaqlar üçün maskalardan istifadə edilir. Antisellülit massaj yağlarının tərkibində ərik yağı da olur, əriyin özündə isə üzdəki xırda qırış-ların hamarlanması üçün, gəncləşdirici, yumşaldıcı maskalar hazırlanır.
Azərbaycanda, xüsusilə Ordubadda əriyin çox nadir və həmin areala məxsus növləri vardır: Əsgərabad əriyi, limon ərik, göy ərik buna misaldır. Ordubadın meyvə bağları, dağ bulaqları, kəhrizləri və gül - çiçəkli aurası tarixən səyyahların diqqətini cəlb edib. Bunlardan biri, fransız etnoqraf İ.İ.Şo-pen (1798 - 1870) Qafqazın, o cümlədən İrəvan və Naxçıvan xanlıqlarının tarixinə və coğrafiyasına həsr etdiyi əsərində, əla meyvələri - üzümü, əriyi, şaftalısı, albuxarası, heyvası olan Ordubad bağlarının Qafqazda, hətta Şərqdə şöhrət tapdığı, həmçinin sağlam iqlimi haqqında məlumat verib.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından