Formula-1 yarışları ilə əlaqədar Bakıda məktəblərin sentyabrın 21-dən sonra başlayacağı iddia edilir. Ötən günlərdə Elm və Təhsil Nazirliyi sözügedən məlumatların həqiqəti əks etdirmədiyini bildirsə də, bu, mübahisəli mövzu olaraq qalır.

Yeni tədris ili nə vaxt başlamalıdır? Bununla bağlı məhdudiyyətlərin tətbiqinə ehtiyac varmı?

Globalinfo.az-a danışan təhsil eksperti Elşən Qafarov deyib ki, ümumtəhsil məktəblərində tədris ilinin müddəti ilə bağlı Nazirlər Kabinetinin (NK) 24 fevral 2020-ci il tarixli 66 nömrəli qərarı mövcuddur:

“Qərara əsasən, məktəblərdə tədris ilinin başlanması, bitməsi, tətillər və yarımilliklərin müddəti konkret şəkildə müəyyən edilib. Həmçinin qərarda göstərilir ki, ölkə üzrə tədris ilində dəyişikliklər yalnız NK-nın qərarı ilə mümkündür. Fərdi məktəblərdə isə dəyişiklik Elm və Təhsil Nazirliyinin əmri ilə mümkündür. Məsələn, tədris ili sentyabrın 15-i deyil, 21-də başlayacaqsa, bunun üçün qeyd olunan qərar verilməlidir. Əks halda, tədris ili əvvəlki kimi 15 sentyabrdan başlayacaq”.

Ekspert qeyd edib ki, Formula-1 yarışının keçirildiyi ərazilərdə ümumtəhsil məktəblərinin sayı azdır:

“5-10 məktəb üçün ölkə üzrə tədris ilinin başlanma vaxtının dəyişdirilməsi qəbul edilməzdir. Lakin yarışın keçirildiyi və ya yaxın ərazilərdəki məktəblərdə alternativ tədbirlər nəzərdə tutula bilər”.