Ukraynanın Rusiyanın ucqar ərazilərinə hücumu Kremldə ciddi sarsıntı yaradıb. Moskvanın müharibə zonasından uzaq hesab etdiyi bölgələrdə baş verən bu əməliyyat bir sıra məsələləri gündəmə gətirib. Ekspertlər hesab edirlər ki, bu hücum müharibənin gedişinə ciddi təsir göstərə, Kreml üçün yeni təhlükəsizlik dilemması yarada və regionda balansı dəyişdirə bilər.

Bu hücum Rusiya Prezidenti Vladimir Putin üçün hansı siyasi və hərbi perspektiv vəd edir? Qərb və xüsusilə ABŞ bu hücumda hansı rolu oynayıb? Artan təzyiq fonunda Moskvanın taktiki nüvə silahına əl atmaq ehtimalı varmı?

Globalinfo.az-a danışan politoloq Mütəllim Rəhimli deyib ki, Rusiya danışıqlardan yayınaraq Ukrayna ərazilərindən daha çox pay umurdu:

“Hesab edirdi ki, qarşı tərəf onun nazı ilə oynayacaq, ancaq belə olmadı. Deyilənlər təsdiqini taparsa, bu o deməkdir ki, dünən Rusiya strateji aviasiyasının 34 faizini itirib. Bu olduqca dəhşətli məğlubiyyətdir!

Ukraynanın bu miqyasda əməliyyatı təkbaşına aparmaq gücü olmadığını hər kəs bilir. İlk növbədə bunun üçün dəqiq kəşfiyyat məlumatları tələb olunur. Daha sonra isə müəyyən edilmiş hərbi bazaların eyni anda vurulmasını həyata keçirmək üçün yetərli hərbi potensialın olmalıdır. Bunun hər ikisini, görünür, ABŞ və Qərb təşkil edib. Onlarsız Ukraynanın bunu etməyə gücü çatmazdı.

İndi ABŞ və Qərb Kremlə deyir ki, atəşkəs danışıqlarını uzatmağın və özünü yekəxana aparmağın heç bir mənası yoxdur. Belə davranış davam edərsə, yeni bir zərbənin də olacağı istisna deyil”.

Politoloq qeyd edib ki, Rusiya bunun əvəzini çıxmağa çalışacaq:

“Putin bu məğlubiyyətdən sonra atəşkəsə razılaşarsa, ölkə içındə reputasiyası tamamilə sıfra düşər, ictimai rəydə məğlubedilməz lider obrazını itirər. Ona görə də yaxın günlərdə Rusiyanın adekvat cavabını gözləyə bilərik. Çox güman ki, yerdə qalan bütün resurslarından istifadə edərək Ukraynaya ciddi zərbə endirməyə çalışacaq. Ancaq bu zərbələri Ukraynanın arxasında dayanan qüvvələrə endirməyə cəsarət edə bilməz.

Rusiya bu hücumla böyük zərərə uğradılsa da, məğlub edilməyib. Bunun üçün 2-3 belə kütləvi zərbəyə ehtiyac var. Ondan sonra danışıqlar masasında özünü “ağıllı” aparacaq”.