Ötən gün Polşada prezident seçkilərinin qalibi Karol Navrotskinin Rusiya-Ukrayna müharibəsi ilə bağlı mövqeləri böyük maraq doğurub. O, Rusiya ilə münasibətlərdə dialoqa açıq olduğunu bildirir və Ukraynanı hədəf alan çıxışları ilə seçilir. Polşa indiyə qədər Ukraynaya yaxın dövlət kimi tanınsa da, yeni prezidentin mövqeyi regiondakı balansı necə dəyişəcəyi sual doğurur.

ABŞ-dan sonra Polşanın da eyni istiqamətdə addım atması nəyi ifadə edir?

Globalinfo.az-a danışan politoloq Rəşad Bayramov bildirib ki, Polşada prezident seçkilərinin birinci turunda Tşaskovskinin qalib gəlməsi, hakim koalisiyanın onu dəstəkləməsinə baxmayaraq, ikinci turda da onun qalib gəlmək ehtimalını artırırdı:

“Lakin nəticə etibarilə Polşa Seçki Komissiyasının qərarı ilə Navrotskinin cüzi fərqlə prezident seçildiyini gördük. Polşada prezidentin səlahiyyətləri xeyli məhduddur. Buna baxmayaraq, prezident hökumətin bir sıra təşəbbüslərinə və parlamentin qəbul etdiyi qərarlara veto qoymaq hüququna malikdir. Mühafizəkar namizəd Navrotskinin Brüsselə qarşı məsafəli münasibəti, eləcə də Ukraynanın NATO və Aİ-yə üzvlüyünə isti baxmaması məlumdur. O, bu mövqeyini dəfələrlə müxtəlif platformalarda açıq şəkildə ifadə edib. Ölkə daxilində miqrant axını kimi məsələlərdə də sərt mövqe nümayiş etdirib. Donald Tuskun baş nazirliyi dövründə Tşaskovskinin prezident seçilməsi hazırkı hakimiyyətin siyasətini daha rahat davam etdirməsi üçün geniş imkanlar yaradacaqdı. Lakin Tusku sərt şəkildə tənqid edən Navrotskinin prezident olması, istər-istəməz, ölkə daxilində siyasi böhranı dərinləşdirəcək. Bu böhran zamanla növbədənkənar parlament seçkilərinin keçirilməsinə səbəb ola bilər. Namizədlər arasında nəticələrin çox az fərqlə müəyyənləşməsi isə Polşa cəmiyyətində parçalanmanın mövcud olduğunu göstərdi”.

Politoloqun sözlərinə görə, Navrotski Rusiya hakimiyyətinə qarşı da sərt mövqe sərgiləyir:

“Bir müddət əvvəl Polşada Qırmızı Orduya aid bir heykəlin sökülməsinə görə Rusiya Navrotski barəsində cinayət işi qaldıraraq onu beynəlxalq axtarışa vermişdi. Hazırkı şəraitdə Ukraynaya dəstəyin tamamilə dayandırılması gözlənilməsə də, əvvəlki qədər asan və rahat şəkildə yardım göstərmək mümkün olmayacaq. Bu, təkcə Rusiya ilə bağlı məsələ deyil, həm də Navrotskinin prosesi necə dəyərləndirməsindən irəli gəlir. Onu müəyyən mənada Donald Trampın siyasi xəttinə yaxın bir lider kimi də qiymətləndirmək olar. Ukrayna üçün qəti dönüş olmasa da, bu ölkəyə edilən yardımlarda Polşanın rolu böyükdür. Avropa və Qərbin Ukraynaya yönələn logistik dəstəyi əsasən Polşa vasitəsilə təmin olunurdu”.