Türkiyənin Vətən Partiyasının lideri Doğu Perinçək Globalinfo.az-a müsahibəsində ölkəsinin hazırda NATO-nun hədəfində olduğunu bildirib.

Sitat: “NATO hazırda Türkiyə sərhədlərində təlimlər keçirir. Dədəağaç, Gümülcinədən Baltik dənizinə qədər uzanan ərazidə səkkiz NATO ölkəsi ABŞ-ın komandanlığı altında bu təlimdə iştirak edir. Və bu təlimin hədəfi Türkiyədir.”

NATO və Türkiyə arasında nə baş verir? Gərginliyin olması nə dərəcədə realdır və bunun səbəbi nədir?

Globalinfo.az-a danışan siyasi şərhçi Füzuli Qurbanov deyib ki, heç bir gərginlik yoxdur:

“Əksinə, bütövlükdə Qərb, xüsusilə NATO üçün Türkiyə əhəmiyyəti artan və dinamik inkişaf edən güclü dövlət kimi yeni status almaqdadır. İndi böyük güclər Bakı və ya Ankaranın adını çəkdikdə, faktiki olaraq “Türkiyə-Azərbaycan” tandemini nəzərdə tuturlar. Son zamanlar isə ən çox göz önünə gələn Türk Dövlətləri Təşkilatıdır (TDT).

Türkiyə NATO-nun yeganə üzvüdür ki, Yaxın Şərq, Şərqi Avropa, Mərkəzi Asiya və hətta Uzaq Şərqdə sülhyaradıcı rol oynaya bilir. Türk diplomatiyası ABŞ, Avropa İttifaqı (Aİ), Rusiya-Ukrayna, Suriya, Liviya, Pakistan-Hindistan, İran arealında çox fəaldır. Türk diplomatiyasının uğurlu nümunəsi olan Azərbaycan diplomatiyası da Türkiyə, İsrail, Ukrayna, Rusiya, Suriya, hətta Afrika və Sakit Okean hövzəsində, eyni zamanda Avropada da aktivdir”.

Siyasi şərhçi bildirib ki, NATO bu qədər böyük, fəzilətli, sülhpərvər gücə qarşı heç bir addım atmaz:

“Bundan əminəm. Əksinə, Qərb diplomatiyası praqmatik və rasionaldır. Ona görə də bu gücdən yararlanmağa çalışar.

Türkiyə böyük dövlətdir, orada Perinçək də danışa, yaxud bəlkə də, danışdırıla bilər. Lakin bu, yalnız bir səsdir və müəyyənedici deyil”.