Azərbaycanda “Reklam haqqında” qanuna edilən dəyişikliklər geniş müzakirələrə səbəb olub. Buna əsasən, bloqerlər və influenserlər sınamadıqları məhsulları istifadə edirmiş kimi təqdim edib reklam edə bilməzlər. Həmçinin hər bir influenser artıq VÖEN sahibi olmalı və hüquqi məlumatlarını açıq şəkildə qeyd etməlidir. Bu dəyişikliklərlə sosial mediada “gizli reklam”, “aldadıcı kontent” və “rəqəmsal xaos” dövrünün tədricən sona çatması və ədalətli rəqabət mühitinin formalaşması gözlənilir. Bununla belə, bəzi vətəndaşlar belə nəzarətin çətin olacağını düşünür, digərləri qərardan sonra blogerlərin reklam qiymətlərini artıracağını deyirlər.

Sözügedən dəyişikliklər nə vəd edir?

Globalinfo.az-a danışan iqtisadçı Eldəniz Əmirov deyib ki, heç kim vergidən yayına bilməz:

“Reklam gəlirləri əldə edərək, onu müxtəlif yollarla gizlətməyə çalışanlar üzərində vergi nəzarəti gücləndirilməli idi. Təbii ki, aparıcılar, bloger və influserlər də reklamlardan əldə etdiklərini gəlirə görə vergi ödəməlidirlər. Bəzən bunu müəyyən etmək çətin olur. Ona görə də hazırda dünyada vergi araşdırmaları ciddi şəkildə aparılır. İnkişaf etmiş ölkələrdə gəlir əldə edən təsərrüfat subyektləri, sözün əsl mənasında, polisdən, hüquq-mühfizə orqanlarından daha çox, vergi yoxlamalarından qorxurlar. Azərbaycanda da peşəkar kadrlar nəzarət, tədqiqat mexanizminə cəlb olunmalı, bütün gəlir mənbələri müəyyən edilməlidir”.

İqtisadçı əlavə edib ki, indi rəqəmsal reklama nəzarət artacaq:

“Həmin şəxslərin real reklam qiymətləri müəyyənləşdirilməlidir. Bununla da, vergidən yayınma hallarının qarşısı alınmalıdır”.