Mayın 15-də Rusiya və Ukrayna nümayəndələri arasında İstanbulda görüş baş tutacaq. Məlumata görə, Rusiya Prezidenti Vladimir Putin bu platformada iştirak etməyəcək. Ümumiyyətlə, hər iki ölkənin nümayəndələri arasında reallaşacaq bu görüş müharibənin bitməsi istiqamətində böyük ümidlər yaradır.

Putinin görüşdən imtinası ona nə vəd edir? Ümumilikdə İstanbul görüşünün perspektivi varmı?

Globalinfo.az-a danışan politoloq Tofiq Abbasov bildirib ki, İstanbulda keçirilən görüşün strateji əhəmiyyətini böyütmək mənasızdır:

“Bu, sadəcə ilk addımdır. Rusiya Prezidenti Vladimir Putin, təbii ki, Volodimir Zelenski ilə üz-üzə oturmayacaq və həmin görüşə getməyəcək. Zelenskinin səlahiyyət müddəti başa çatıb və onun statusu artıq yoxdur. Bu səbəbdən, onu Rusiya həm tanımır, həm də rəsmi şəxs kimi mövqeyini qanuniləşdirməyəcək. Ona görə də bu görüşdən böyük gözləntilərim yoxdur.

Ukrayna isə görüşdən əliboş qayıtmaq istəmir. Müharibənin dayandırılmasını istəyirlər, amma burada yanaşmalar fərqlidir. Rusiya əvvəlcə danışıqların aparılmasını, sonra isə atəşkəsi istəyir. Ukrayna isə atəşkəsin öncə əldə olunmasını tələb edir. Hazırda təşəbbüs və üstünlük Rusiyada, daha çox itirən isə Ukraynadır. Avropanın müharibənin dayanmaması üçün göstərdiyi cəhdlər də danılmazdır. Avropa süni şəkildə Rusiya təhlükəsini şişirdərək, ona qarşı qorxu yaratmağa çalışır. Yəni Ukraynanı məğlub etdikdən sonra Kreml, Qərbi hədəf alacaq. Buna görə də Ukraynanın əli ilə Rusiyanı zəiflətmək istəyirlər.

Ukrayna müharibə aparmaq qabiliyyətini itirir, çünki resursları tükənir. Bu vəziyyətdə, Rusiya Ukraynanı işğal etmək istiqamətində daha böyük şanslara sahib olur. Hər iki ölkə çıxış yolunu tapmaq üçün dialoqa başlamalıdır və Rusiya bunun fərqindədir”.

Politoloq əlavə edib ki, Avropa, “qaynar sobadakı şabalıdları” Ukraynanın əli ilə çıxarmağa çalışır:

“Ukraynanın əli çox pis yana bilər. Nəticədə heç bir şeyə yaramayacaq. Kollektiv Qərb Ukraynanı bu müharibəyə sürüklədi. 2008-ci ildəki Gürcüstan nümunəsi təkrarlanır. Gürcüstan kampaniyası tez bitdi, amma Gürcüstan ciddi itkilər verdi. Ukraynanı da Qərb eyni şəkildə dəstəklədi və bu, Ukrayna üçün faciəyə çevrilib”.