Ermənistan tərəfi şərti sərhəddə hərbi təxribatlardan əl çəkmir. Ötən gün 20:45-dən saat 21:30-dək Ermənistan silahlı qüvvələrinin bölmələrinin Gorus və Çəmbərək rayonları istiqamətlərində yerləşən mövqelərindən Azərbaycan Ordusunun mövqelərini atıcı silahlardan fasilələrlə atəşə tutması da bunun açıq təzahürüdür. Görünür ki, yenidən iki ölkə arasında gərginliyin artmasında maraqlı olan tərəflər hələ də geri çəkilmək istəmir.

Bu sözləri Teleqraf-a Ermənistanın artan təxribatlarına münasibət bildirən hərbi ekspert, ehtiyatda olan polkovnik Üzeyir Cəfərov deyib.

Polkovnik bildirib ki, Ermənistan daxilində və kənarda olan qüvvələr bölgədə sülhün olmasına qarşıdır: “Amma qarşı tərəf yaxşı bilir ki, təxribatlarına cavab olaraq Azərbaycan Ordusunun adekvat addımları onlar üçün daha sarsıdıcı olur. Baş verən təxribatlarda mərkəzi hakimiyyətə tabe olmaq istəməyən generalların da rolu istisna edilmir. Onlar Baş nazir Nikol Paşinyana bu addımlarla hansısa mesaj verməyə çalışırlar”.

Ekspertin fikrincə, Azərbaycanla Ermənistan arasında ən azından çərçivə sülh razılaşması imzalanana qədər şərti sərhəddə qarşı tərəfin bu cür təxribatlara əl atacağı şübhəsizdir: “Erməni hərbiçiləri hərbi təxribatlara qədər səngərlərdə müxtəlif uyğunsuz hərəkətlər edərək Azərbaycan əsgərini təxribata çəkməyə çalışırdı. Artıq yaz aylarıdır və başı pozuq erməni əsgərlərinin növbəti dəfə belə hərəkətlərə əl atacağı da şübhəsizdir. Bu həmçinin Ermənistan tərəfindən şərti sərhəddə yerləşdirilən Avropa İttifaqının “missiya”sı üçün də bir “mövzudur”. Onlar ərazidə boş dayanmaqdansa, erməni əsgərlərinin təxribatlarına cavab olaraq Azərbaycan Ordusunun atacağı addımları öz “hesabatlarına” daxil etmək üçün növbətçilik aparırlar”.

Milli Məclisin müdafiə, təhlükəsizlik və korrupsiya ilə mübarizə komitəsinin üzvü, deputat Hikmət Babaoğlu erməni tərəfinin şərti sərhəddə hərbi təxribatları ənənə halına gətirdiyini söyləyib.

Komitə üzvü Azərbaycan Müdafiə Nazirliyinin az qala hər gün erməni təxribatları ilə bağlı məlumatlar yaydığını bildirib: “Onlar sülhə qarşı mövqe müəyyənləşdirməyə çalışır. Ermənistan ictimaiyyətinə “biz mövcud vəziyyətlə barışmırıq” mesajı vermək istəyirlər. Bu hər şeydən öncə Paşinyana seçki öncəsi təbliğat üçün lazımdır. O daxili auditoriyaya deməyə çalışır ki, “biz növbəti müharibəyə hazırlaşırıq və bunun üçün da dağıdıcı silahlar əldə edirik”. Digər məqsəd qlobal ictimai rəyə və ermənilərin havadarlarına problemin hələ həll olunmadığını çatdırmaqdan ibarətdir. Elə bir mənzərə yaratmağa çalışırlar ki, Ermənistanla Azərbaycan arasında sülh yoxdur”.

Hikmət Babaoğlu Ermənistan hakimiyyətinin ATƏT-in Minsk qrupunun ləğvi ilə bağlı addımlar atmamasının da bu amillərlə bağlı olduğunu deyib: “Düşüncələr, diplomatik cəhdlər və hərbi aqressiya mövqeyi Ermənistanın yeni müharibəyə hazırlaşdığının açıq göstəricisi kimi qəbul edilməlidir. Əgər yeni müharibə baş verərsə, Ermənistan indiki şərtləri axtarmalı olacaq. Çünki Azərbaycan Prezidenti İlham Əliyev Ağdamdakı çıxışında bir daha bu məsələyə toxundu. Bəyan edildi ki, “yeni reallığı qəbul etməyənlər sonra peşiman olurlar”. Ona görə də Ermənistan bu gün yeni reallığı qəbul etməyib şərti sərhəddə təxribat törədirsə, sonradan yenə də peşiman olacaqdır”.