ABŞ və Çin rüsumların qarşılıqlı olaraq 90 gün müddətinə azaldılması barədə razılaşıb. İki ölkə arasında ticarət və iqtisadi münasibətlərin davam etdirilməsi məqsədilə danışıqlar üçün mexanizmin yaradılacağı gözlənilir.

Bu, iki ölkəyə nə vəd verir?

Globalinfo.az-a açıqlama verən politoloq Sultan Zahidov bildirib ki, İsveçrədə iki gündür ABŞ və Çin nümayəndələri arasında gömrük rüsumlarının yüngülləşdirilməsi ilə bağlı danışıqlar davam edir:

“İlkin razılıq əldə olunub. Bu razılığa əsasən, tərəflər 90 gün ərzində qarşılıqlı olaraq tətbiq etdikləri gömrük rüsumlarını azaltmalıdırlar. Bu, rüsumların 115 faiz qədər azalmasını nəzərdə tutur. ABŞ tərəfindən Çinə tətbiq olunan əvvəlki gömrük rüsumu 145 faiz, Çin tərəfindən isə 125 faiz idi. Görünür, ticarət müharibəsinin həm ABŞ, həm də Çin iqtisadiyyatına ciddi mənfi təsirləri olub. Buna görə də belə danışıqların başlanması qərarı qəbul edilib.

Xatırladaq ki, indiyə qədər Çin ABŞ-ın əsas ticarət tərəfdaşlarından biri idi. Ticarət müharibəsi nəticəsində ABŞ iqtisadiyyatında ciddi problemlər yaranmışdı. İxracat azalmış, inflyasiya ilə bağlı narahatlıqlar ortaya çıxmış, maliyyə bazarında çöküş ehtimalları yaranmışdı. Hətta bu vəziyyət ölkədə işsizlik problemini də dərinləşdirə bilərdi.

ABŞ, əvvəlki sərt ritorikadan imtina edərək, Çinlə ticari gərginliyi azaldıb. Bu danışıqlar, iki ölkə arasındakı münasibətlərdə mühüm dəyişikliklərə səbəb ola bilər. 90 günün sonunda, bu müddətin uzadılması və gömrük rüsumlarının daha da aşağı salınması ilə bağlı yeni razılıqlar əldə edilə bilər. Hər şey bu müddətdən asılıdır”.