“Qobustan qoruğuna giriş biletlərini kəskin bahalaşdırıblar”.

Globalinfo.az xəbər verir ki, bunu iqtisadçı Natiq Cəfərli deyib.

O bildirib ki, əvvəllər yerli ziyarətçilər üçün qiymət 4, əcnəbilərə 10, tələbələrə 1, məktəblilərə isə 0.40 AZN olub:

“Bir neçə gün öncə yeni qiymətlər elan ediblər. İndi yerli ziyarətçilər 7, əcnəbilər 20, tələbələr 3, məktəblilər 2 manat ödəməli olacaqlar. Qiymətləri turistlər üçün 2, tələbələr və məktəblilər üçün isə 5 dəfə artırıblar. Ümumiyyətlə, turistlər üçün muzeylərə, qoruqlara baha bilet yanaşması, dünyanın bir çox ölkələrində var, bunu anlayıram. Amma məkanın təbliğatı ciddi qurulandan sonra bu addımı atmaq mümkündür”.

İqtisadçı Qobustan qorğunu Türkiyədəki “Aya Sofya” məscidi ilə müqayisə edib:

“Orada yerli-əcnəbi qiymət fərqi anlaşılandır. Amma biz hələ Qobustanı tanıda bilmişikmi, indidən 2 qat qiymət fərqi qoyuruq? Bundan başqa, öz şagirdlərimizə, tələbələrimizə qiyməti niyə artırırıq?! Türkiyədə məktəblilər üçün əksər muzeylər tam pulsuzdur. Çünki bu, həm də hekayə quruculuğunun bir hissəsidir – məktəblilər, tələbələr dünyaya daha açıq olurlar, müxtəlif ölkələrdə yaşayan həmyaşıdları ilə danışır və hər biri “turizm agentinə” çevrilirlər”.