Son vaxtlar Bakının müxtəlif ərazilərində plana düşən binalarla bağlı suallar artır. Bəzi hallarda sakinlərə əvvəlcədən xəbər verilmədən bina plana salınır, bəzən isə söküntü qərarı açıqlansa da, illərlə heç bir real addım atılmır. Vətəndaşlar ya kompensasiyanın ədalətli olmadığını bildirir, ya da müqavilə bağladıqları tikinti şirkətindən illərlə xəbər ala bilmirlər.

Bir bina və ya ərazi necə plana salınır? Planlaşdırma hansı meyarlara əsasən aparılır?

Globalinfo.az-a danışan Əmlak Ekspert Mərkəzinin direktoru Ramil Osmanlı deyib ki, paytaxtda şəhərsalma ilə bağlı qərarlar müxtəlif formada verilir:

“Bakının Baş planı nəzərə alınmaqla, qərarlar qəbul olunur. Paralel olaraq, həmin istiqamətdə şəhərsalma tədbirləri ilə bağlı görüləcək işlər sosial-iqtisadi inkişaf proqramlarına daxil edilir və təsdiq olunur. Ardınca proqramların icrası müvafiq icra hakimiyyəti orqanlarına, Dövlət Şəhərsalma və Arxitektura Komitəsinə, Bakı Şəhər İcra Hakimiyyətinə, rayon icra hakimiyyətlərinə, Əmlak Məsələləri üzrə Dövlət Xidmətinə və sair göndərilir. Söküntü prosesi həyata keçirilərkən ilk növbədə binanın tikildiyi dövrdə onun mövcud fiziki vəziyyəti, aşınma və köhnəlmə göstəriciləri, digər yaşayış minimumunun tələblərinə uyğun olub-olmaması nəzərə alınır, dövlət ehtiyacı üçün ərazi üzrə infrastruktur işlərinin görülməsi kimi məsələlər təhlil olunur”.

Ekspert bildirib ki, qanunvericilikdə sakinlərin öncədən məlumatlandırılması nəzərdə tutulmayıb:

“Mülkiyyət hüquqlarına uyğun olaraq, söküntü ilə bağlı dövlət ehtiyacları üçün alınma barədə qərar qəbul olunursa, mütləq bu haqda sakinlərə bildiriş və məlumatlar göndərilir. Qiymətlə bağlı məsələlərə gəldikdə isə, bu istiqamətdə müzakirələr, mübahisələr həddən artıq çoxdur. Dövlətin apardığı söküntü proseslərində daha çox müstəqil qiymətləndiricilər cəlb olunur. Daha sonra prosesə başlanılır. Ola bilər ki, müəyyən edilən qiymətdən tərəflərdən biri və ya heç biri razı qalmasın. Lakin həmin zaman ərazi üzrə bazar qiymətləri nəzərə alınır”.

Vəkil Asim Abbasovun sözlərinə görə, ölkədə qəzalı vəziyyətdə olan binaların sökülərək yerində müasir tələblərə uyğun yenilərinin tikilməsi barədə Nazirlər Kabineti qərar qəbul edir və bunun icrası yerli icra hakimiyyəti orqanına tapşırılır:

“Qərar əsasında rayon ərazisində sökülməli olan binaların dəqiq dairəsi müəyyən edilir, söküntü işlərinin həyata keçirilməsi ilə bağlı müvafiq sərəncam verilir. Hər hansı bir bina baş plan, şəhərsalma sənədləri əsasında və icra hakimiyyətinin təşəbbüsü ilə söküntü planına salına bilər”.