Aprelin 24-də Mərkəzi Bankın sədri 9 iqtisadçı ekspertlə ənənəvi formatda görüşüb. İştirakçıların sözlərinə görə, bu dəfə həmişəkindən bir qədər gərgin müzakirə olub. Pul siyasəti, manatın məzənnəsi, valyuta hərracları, kartlardan oğurlanan pullar və s. ətrafında diskussiya gedib.

Bu görüşlər ölkənin bank, valyuta və sair sahələrinə nə kimi töhfə verir və ya verəcək?

Globalinfo.az-a danışan iqtisadçı Samir Əliyev deyib ki, adətən, görüş rübdə bir dəfə keçirilir.

Onun sözlərinə görə, müzakirələr bir neçə saat davam edir:

“Məsələn, görüş müddəti 2 saat nəzərdə tutulurdu, lakin 3 saatdan çox davam etdi. Sözün yaxşı mənasında müzakirə gərgin oldu. Belə ki, fikir mübadiləsi aparıldı, əks arqumentlər gətirildi və s. Ümumilikdə bu görüşü faydalı hesab edirəm. Çünki burda ikitərəfli qazanc var.

Ekspertlərin qazancı odur ki, problemi yaxından başa düşmək imkanı əldə edirik. Bildiyimiz kimi, bəzən Mərkəzi Bank bütün məlumatları açıqlamır. Tutaq ki, baş verən proseslərin hansısa hissəsini açıqlayır, digərini açıqlamır. Bəzən biz də məlumatların qıtlığından əziyyət çəkirik, prosesi tam başa düşməyə bizə imkan verilmir. Qiymət vermək üçün 100 faizlik məlumat olmalıdır. Mərkəzi Bankın da qazancı budur ki, atdığı addımın cəmiyyətə düzgün ötürülməsinə nail olur. Məsələn, ola bilər jurnalist məlumatı yanlış izah edər, ekspert də hadisəni neqativ yöndən şərh edər. Bu isə yaxşı hal deyil”.

İqtisadçı deyib ki, müzakirə olunan məsələlərdən biri də hərraclarla bağlı olub:

“Bildiyiniz kimi, Mərkəzi Bank bir aydır hərracların nəticələrini açıqlamır. İki hərrac keçirilir, Dövlət Neft Fondunun valyutaları satılır və həmin pul dövlətə transfer edilir. Bununla bağlı da məlumat verilmir. Bank da açıqlamasında buna ehtiyac görmədiklərini bildirir. Biz ekspertlər də bunun əleyhinə çıxmışdıq. Sədr də görüşdə artıq açıqlama verməmə arqumentlərini dedi. Bildirdi ki, bazara pul çıxarsa məlumat veriləcək, amma həmin valyuta Neft Fondunun vəsaiti olduğu üçün məlumatı onlar açıqlamalıdır. Təbii ki, biz bununla razılaşmadıq. Çünki burada söhbət ictimai vəsaitdən gedir. Hamımız da bilirik ki, neftin pulu kiminsə şəxsi vəsaiti deyil. Sədr özü də dedi ki, bəzi məsələlərdə məsləhətləşmək daha yaxşı olardı”.

Samir Əliyev devalvasiya məsələsinə də toxunub:

“Baxın, tez-tez mediada valyuta bazarı ilə bağlı açıqlamalar gedir. Mərkəzi Bank ondan narahatdır ki, hansısa ekspert devalvasiyanın olacağı fikrini irəli sürür və bəziləri buna inanır. Hətta buna inanalar gedib dollar alırlar. Beləliklə də, çaşqınlıq yaranır. Bunlar da ona görə narahatdırlar ki, cəmiyyətdə əsassız fikirlər yaranmasın. Əgər hərracda bu gün dollar daha çox satılırsa, bu o demək deyil ki, həmin valyutaya tələbat artıb. Neft Fondunun öz öhdəliyi var, onlar normadan artıq dollar satmırlar. Bəli, ola bilər ötən illə müqayisədə bu il dollar çox satılıb. Səbəb ona tələbatın olması deyil, sadəcə, satışın çoxluğu onu göstərir ki, büdcə qarşısında bunun öhdəliyi çoxdur. Bu istiqamətdə müzakirələr aparıldı. Görüş faydalı idi. Düşünürəm ki, digər qurumlar da bu nümunədən istifadə edə bilər”.