MDB ölkələri “Əmək Şöhrəti Şəhəri” fəxri adının təsis edilməsinə razılıq veriblər.

Publika.az xəbər verir ki, bu barədə Rusiyanın xarici işlər naziri Sergey Lavrov MDB Xarici İşlər Nazirləri Şurasının Almatıda keçirilən iclasından sonra bildirib.

“Böyük Qələbənin ildönümü ilə əlaqədar biz MDB-də yeni titulun – “Əmək şöhrəti şəhəri 1941-1945”in tətbiqinə qərar verdik”, - Lavrov bildirib.

Onun sözlərinə görə, hazırda şəhərlərin konkret siyahısı razılaşdırılır. Tezliklə dərc olunacaq.

Qeyd edək ki, bu ad şəhərdə yerləşən müəssisələrdə hərbi və mülki təyinatlı məhsulların fasiləsiz istehsalını təmin etməklə, kütləvi əmək qəhrəmanlığı və fədakarlıq nümayiş etdirməklə sakinləri Böyük Vətən Müharibəsində Qələbənin qazanılmasına mühüm töhfə vermiş şəhərə veriləcək.

Qeyd edək ki, İkinci Dünya Müharibəsində SSRİ-nin əsas neft tədarükçüsü Bakı olub. Məhz Bakının müstəsna xidmətləri sayəsində SSRİ müharibədə qalib gəlməyi bacarıb. Bakıya “Qəhrəman şəhər” adı verilməsi də bir neçə dəfə gündəmə gətirilib.