Sosial şəbəkələrdə Bakıda xəttə çıxmalı olan sərnişin avtobuslarının sayının az olduğu iddia edilir. Bildirilir ki, məhz bu səbəbdən gecikmələr müşahidə olunur. Bəzi vətəndaşların fikrincə, say artırılsa, problemlər də aradan qalxar.

Ümumiyyətlə, paytaxtda nə qədər avtobus var?

Globalinfo.az bununla bağlı “BakuBus”a sorğu ünvanlayıb.

Bildirilib ki, şirkət gündəlik 850-dən çox avtobusu marşrut xəttinə buraxır:

“Həmçinin 600 minə yaxın sərnişinin rahat və təhlükəsiz daşınmasını təmin edilir. “BakuBus”ın istismarında fəaliyyət göstərən hər bir marşrut xətti “Marşrut Pasportu” əsasında idarə olunur. Pasportda marşrut xəttinə aid bütün vacib məlumatlar – dayanacaqlar, avtobus sayı, interval, marşrutun başlanğıc və son dayanacağına qədər olan hərəkət vaxtı və digər göstəricilər mövcuddur. Marşrut pasportları Azərbaycan Yerüstü Nəqliyyat Agentliyi (AYNA) tərəfindən hazırlanır və təsdiqlənir”.

Məlumata görə, sərnişin tələbatına uyğun olaraq marşrut xətti üzrə müəyyən edilən saydan daha çox avtobus da xəttə buraxıla bilir.